إزاي تكوني خبيرة كروشيه في أسبوع؟

الكروشيه بالإضافة إلى كونه فن جميل وراقي، إلا إنه مسلي جدًا وبيدي إحساس بالإنجاز لأنه من المشغولات اليدوية النادرة اللي الشغل فيها بتبان نتيجته بسرعة وممكن تخلصي حاجات منه بسرعة نسبية عن التريكو على سبيل المثال.

ده غير إن الكروشيه يدوي بس، يعني اللي هتعمليه تأكدي إن مفيش أي ماكينة في العالم هتقدر تعمل زيه وأعتقد مفيش وقت مناسب لتعليم الكروشيه أفضل من بداية الشتاء، عشان نعمل اللكاليك والأسكارفات والآيس كاب وكل الحاجات اللي ممكن نشتريها بأسعار أغلى كتير من أسعار الخيوط اللي مشغولة منها.

وكمان الكروشيه بيتميز إنك ممكن تشتغليه في أى مكان وأى وقت في البيت قدام التلفزيون في الجلسات العائلية وحتى في العربية لو في مشوار طويل مع زوجك مثلاً..

كده أقنعتك ليه تتعلمي كروشيه، نبدأ نحضّر نفسنا لتعلم الكروشيه.

الكروشيه مش محتاج منك أدوات غير الإبرة والخيط وهنعرف سوا إيه الإبرة المناسبة للخيط المناسب.

الإبر:

فيه أنواع كتير للإبر، بس ممكن نختصرهم في الإبر الألومنيوم والإبر الاستانلس.

الإبر الألمونيوم بتكون ملونة وشكلها كده.

 

أو باللون الفضي الباهت وشكلها كده:

 

عن نفسي بفضّل الملونة لأنها أتقل وأنعم ومش بتضايق مع الخيط.

أما عن الإبر الاستانلس فهي فضي لكن لامعة ورفيعة بشكل عام. 

طيب إمتى هنستخدم الألومنيوم؟ وإمتى نستخدم الاستانلس؟ وإيه الأرقام اللي عليهم دي؟ الأسئلة كلها هنجاوب عليها في الجزء الخاص بالخيوط.

الخيوط:

الخيوط الجميلة بأللوانها المتنوعة وأنواعها المختلفة وممكن تقسيمها بسهولة من غير تعقيدات لخيوط قطن وديه بتكون ناعمة ورفيعة وخيوط صوف بتكون اتخن، لكن في الحقيقة التقسيم معقد أكتر لأن القطن في منه أنواع 100% وأنواع داخل معاها خامات تانيه والصوف كذلك،عشان كده مع الخبرة هانقدر نقسم الخيوط لخيوط رفيعة للصيف وخيوط تخينة من الصوف أو الأكريليك تنفع للشتاء..

الأقطان أو الخيوط الصيفي

 

الصوف أو الخيوط الشتوى 

الخيط المناسب للأبرة المناسبة:

في معادلة بسيطة جدا الخيوط الصيفي بنستعمل معاها الأبرة الإستانلس والخيوط الشتوى بنستعمل معاها الأبرة الألمنيوم..

وبالنسبة لمقاسات الأبر المناسبة مع الخيط فبتكون موجودة على الورقة الخاصة بالخيط في كل الأنواع بالشكل ده وممكن تسألى في محل الخيوط كمان هيساعدوكى جدا..

 

خطوات تعلم الكروشيه:

عرفنا الخيوط وعرفنا الأبر فاضل نتعلم، للتجربة والتعليم بأنصحك بخيط صوف مصرى ميكونش غالى لإن هتشتغلى وتفكى في الأول أكثر من مرة وأبرة من الألمنيوم مناسبة للخيط..

1. لما أتعلمت كروشيه أتعلمته عن طريق الإنترنت فيديوهات ومواقع بتشرح الطرق المختلفة للغرز والخطوات وده موجود بكثرة سواء بحثتى بالعربى أو بالإنجليزى..

وديه مجموعة من الأماكن اللى ممكن تتعلمى مبادئ الكروشيه:

أضغط هنا 1
أضغط هنا 2

وكمان في فيديوهات كتير هاتقدرى تعملى منها كل اللى انتى عايزاه وبخطوات بسيطة ومبسطة ومن قنوات اليوتيوب اللى تستحق تتابعيها:

أضغط هنا 

2. المرحلة التالية أنك تقرى باترونات الكروشيه وهى منقسمة لنوعين باترونات مكتوبة وباترونات مرسومة، المكتوبة بتكون للغرز أسماء مختصرة والباترون بيذكر أسماء الغرز وكام غرزة بالتفصيل ولتعليم قراءة الباترونات المكتوبة أنصحك باللينك ده:

أضغط هنا 

 أما عن الباترونات المرسومة ففيها الغرز ليها رموز معينة بتتحفظ بسهولة وممكن تتعرفي عليها وإزاى تتطبقيها من هنا:

أضغط هنا 1
أضغط هنا  2

المهم في مرحلة التعليم واللى هايخليكم تنفذوا أى حاجة تخطر في بالكم نقطتين:

الأولى: إنكم تربطوا من البداية بين الغرز اللى بتتعلموها وبين شكلها في الباترون وإختصارها في الباترون المكتوب..

الثانية: الخيال، ياعنى لازم يكون خيالكم واسع بحيث تقدروا تتصورا الحاجة اللى بتعملوها والغرز ديه هاتشكلها إزاى ومع الوقت أوعدكم هاتقدروا تشتغلوا من مجرد صورة من غير حتى باترون..

أسهل حاجات لبداية التعلم:

أول ما تتعلمى الكروشيه هاتحسى إنك عايزة تعملى كل حاجة خصوصاً لو دخلتى على صور جوجل واليوتيوب،بس عشان ميتحولش حماسك لإحباط إبدئى بحاجات بسيطة تقدرى تنجحى فيها بسهولة وهاتلاقى في المنتديات العربية ورش لعمل حاجات كتير بالصور والتفاصيل..

ومن الحاجات السهلة اللى ممكن تعمليها في الأول الايس كاب سواء ليكى أو لبيبى وطبعا الإسكارفات بعد كده بالتدريج هاتقدرى تعملى كل حاجة..

في النهاية الكروشيه من أجمل الفنون اللى ممكن فعلاً تحسسك إنك مفيدة ومنجزة وفنانة ومتميزة،أنا هنا بتكلم كمان عن نفسى لأنى أتعلمت الكروشيه في وقت كنت حاسه بفراغ في حياتى كبير وقدر يخلينى متماسكة وسعيدة الحمد لله..
للمقال الاصلي:إزاي تكوني خبيرة كروشيه في أسبوع؟