مكياج مميز في أبسط خطوات

المكياج بالنسبة لبنات كتير أسلوب حياة، لازم تخرج وهي حاطة مكياج كامل، وبالنسبة لبنات تانية البعبع اللي بيخوف وبيحولنا لعروسة المولد، وبالنسبة لينا في "نون"، وبما إننا مهتمين بالجمال سواء جوة أو برة هنقدم ليكي في خطوات بسيطة طريقة تحطي بيها مكياج لنفسك.

خطوات مكياج طيبعي:

المكياج ده بيدي للوجه لوك طبيعي وفي نفس الوقت جميل ومميز.

1. استخدمي لون ظل جفون طبيعي وغطى بيه الجفن بالكامل، عشان يكون القاعدة اللي هتحطي عليها باقي مكياج العيون.

2. استخدمي في الخطوة دي فرشاة وطبّقي لون زي النحاسي الفاتح أو أي لون فاتح تحبيه على الجفن بالكامل.

3. استخدمي اللون البيج على المنطقة تحت الحاجب مباشرة، وادمجي اللون ده مع اللون اللي استخدمتيه في الخطوة السابقة.

4. استخدمي اللون النحاسي الفاتح اللي في الخطوة رقم 2 في إنك تعملي خط رفيع تحت العين، الخطوة دي هتدي شكل متوازن أكتر للعين وتناسق في الألوان.

5. استخدمي اللون البني في نهاية الجفن المتحرك على الزاوية الخارجية، وزي ما بنعمل لما بندخّل أي لون جديد، بندمج اللون الجديد في القديم، بحيث إن الألوان يكون شكلها طبيعي ومتناسق.

6. استخدمي درجة أغمق من اللون البني فوق اللون السابق، عشان يكون فيه تدرج في الألوان بسيط.

7. استخدمي ظل جفون كريمي على المنطقة تحت الحاجب مباشرة.

8. بالقلم الكحل الأسود ارسمي عينيكي.

9. استخدمي الماسكرا على رموشك في الجفن الأعلى والأسفل.

10. استخدمي بلاشر أو أحمر الخدود من اللون البرونزي الفاتح على عظمة الخد، عشان تدي بشرتك المظهر الطبيعي.

11. استخدمي اللون المرجاني -بما إنه أقرب الألوان لبشرتنا- على الخد نفسه، وأفضل طريقة إنك تبتسمي وتستخدمي الفرشاة على الجزء المتحرك مع الابتسامة.

12. استخدمي اللون الوردى الطبيعي كأحمر شفايف، وبعد كده استخدمي ملمع شفاه شفاف.

مكياج للمساء:

1. استخدمي الكونسيلر على منقطة العين لتغطية الهالات السوداء والانتفاخات تحت العين.

2. استخدمي كريم الأساس المُعدّ للعيون أو كريم الأساس العادي لتثبيت مكياج العيون على منطقة العين.

3. استخدمي في الآيشادو ثلاث درجات من نفس اللون، بحيث يكون الأفتح وبعده المتوسط وبعد كده الأغمق زي الصورة، مع دمج كل لون مع اللي قبله، بحيث تعمل مزيج من الثلاث ألوان والتدرج في اللون واضح.

4. في زاوية العين الداخلية استخدمي الهايلايتر من اللون الذهبي أو البينك حسب درجات الآيشادو اللي استخدمتيها، وده بيدي المظهر المُشرق لعينيكي أكتر، وطبعًا بتدمجيه مع باقي الآيشادو.

5. استخدمي نفس اللون الهايلايتر في المنطقة أسفل الحاجب مباشرة.

6. استخدمي الآيلاينر الأسود في خط مستقيم فوق العين، وارسمي العين من الداخل بالكحل.

7. استخدمي الماسكارا كخطوة نهائية.

8. طبّقي الخطوات 10 و11 و12 من المكياج الطبيعي بالألوان المناسبة مع ألوان ظل الجفون اللي استخدمتيها.

ملاحظة: المكياج المسائي ومكياج السهرة بنستخدم قبل ما نبدأ في مكياج العيون كريم الأساس درجة أفتح من لون البشرة، وبعد كريم الأساس بنستخدم البودرة.

مكياج عيون للسهرة:

دي خطوة أكثر احترافية من المكياج السابق، لكن مع اتّباع الخطوات السهلة هتقدري تعملي المكياج السموكي المميز، والمرة دي باللون البني مش باللون الأسود اللي كتير مننا بيخاف يستخدمه.

1. ضعى نقطة من كريم الأساس ووزعيها على الجفن بالكامل، لأنه بيساعد على تثبيت المكياج.

2. على خط الجفن اللي بيفصل بين الجفن المتحرك والجفن الثابت ضعي الآيشادو من اللون البني الفاتح.

3. استخدمي درجه آيشادوا أغمق على اللون السابق على الجفن الثابت.

4. استخدمي ظل الجفون باللون البني اللامع على نصف الجفن المتحرك عند الزاوية الخارجية.

5. اللون البني الأغمق اللي استخدمناه في الخطوة ثلاثة استخدميه بفرشاة رفيعة على أسفل الرموش من الخارج، بحيث يدي العين المظهر السموكي.

6. في الزواية الداخلية للجفن المتحرك استخدمي اللون الذهبي، ومتنسيش تدمجي الألوان في كل خطوة بحيث إن الألوان تكون متداخلة.

7. استخدمي البيج اللامع أو الأبيض أو أي لون هايلايت أسفل الحاجب.

8. استخدمي الكحل في رسم الجفن العلوي، وبعده فرشاة صغيرة عشان تدمجيه مع الآيشادوا وتوزعيه.

9. استخدمي آيشادو أسود في إنك تمدّي خط الكحل للخارج في زاوية العين الخارجية.

 

10. استخدمي الكحل في رسم الجفن السفلي من الخارج على خط الرموش.

11. الخطوة الأخيرة استخدمي الماسكرا.

12. طبقى الخطوات 10 و11 و12 من المكياج الطبيعي بالألوان المناسبة مع ألوان ظل الجفون اللي استخدمتيها.

ملاحظة هامة: في المكياج المسائي ومكياج السهرة بنستخدم قبل ما نبدأ في مكياج العيون كريم أساس درجة أفتح من لون البشرة، وبعد كريم الأساس بنستخدم البودرة.

المصدر: أضغط هنا1
         : أضغط هنا 2
         : أضغط هنا 3

للمقال الاصلي : مكياج مميز في أبسط خطوات