سيما علياء : سكارف الدوائر المتداخلة

الإسكارف ده بسيط جداً على شياكته وجماله ، لو حبيتي تنفذيه يفضل يكون بلونين من الخيوط بحيث تكون كل دائرة بلون ويتبادلوا الأدوار أو بخيط جنجاه وخيط التقفيل يكون سادة .

الغرز المستخدمة :

هانستخدم فيه أربع غرز أساسية، السلسلة chain ، المنزلقة slip stitch، الحشوsingle crochet، والعمود بلفة double crochet .

وهتحتاجي شلتين من الخيط لتنفيذه ..

الفكرة العامة :

فكرة الأسكارف بتعتمد على وجود الدوائر جوا بعض ، عشان نعمل الشكل ده بنعمل اول دائرة عادي ،تاني دايرة بنعمل السلسلة الخاصة بيها ونقفل السلاسل بمنزلقة بس بعد ما ندخلها جوه الدايرة الأولي ونشتغل على الأساس ده ، كل دائرة جديدة نشبكها مع الدائرة القديمة .

باترون الدائرة :

25 سلسلة هانقفلهم بمنزلقة .
40 حشو جوه دائرة السلاسل نفسها ،مش حشو على كل سلسلة .
40 عمود بلفة على كل حشو .
السطر ده فيه تزويد ، بمعني فى أول عمود هانعمل عمودين ، تاني عمود هانعمل عليه عمود واحد ، تالت عمود عمودين ، و هكذا لأخر السطر ..
حشو على كل عمود ونقفل السطر الأخير بمنزلقة ونقطع الخيط .

تقفيل الإسكارف :

بعد ما نخلص الدوائر بالطول اللى إحنا عايزنه فى خطوة أخيرة وهي تقفيل الأسكارف وفيها هانربط كل الدوائر ببعضها البعض بغرزة الحشو بحيث نحافظ على شكله فى دوائر مسطحة متداخلة ..

وبكده يكون الأسكارف خلص