نصائح لقص الشعر فى البيت

بما إننا اتكلمنا قبل كده عن صبغ الشعر فى البيت هنا ، وعن إزاى نقوي شعرنا ونغذيه بطرق جديدة هنا ،  النهارده بقى هانتكلم عن إزاي نقص شعرنا لنفسنا في البيت..

ماحدش يخاف، وماحدش يتخض، الموضوع سهل لو عرفنا الخطوات اللي هانتّبعها، والأهم نعرف إيه قصة الشعر المناسبه لكل وجه لأن للأسف كتير مننا بنختار القصه اللي هانجربها على أساس شكلها في دماغنا أو على موديل في صورة، وده غلط لإن مش كل وجه يليق عليه كل قصه..

أشكال الوجوه بالقصات المناسبة:

الوجه البيضاوي: الوجه البيضاوي مميز جداً لأن كل التسريحات والقصات بتليق عليه، فلو وشك بيضاوي أنت محظوظة جداً..

الوجه الدائري: القصات المدرجه مناسبك جداً لوجهك خصوصاً لو هايبدأ التدريج من عند عظام الخد لإن ده هايخلي الوش يبان أطول..

الوجه على شكل قلب: في الحالة دي الجبهه بتكون عريضة والذقن رفيعة، والقصات القصيرة أو الكثيفة حول الدقن هتكون ممتازة بالنسبه لك، وابعدى عن الغره أو القصه اللي بتعرض الجبهه..

الوجه المربع: الجئي لتسريحات وقصات تخلي زوايا الوجه مش باينه، زي الشعر القصير والشعر الويفي، وابعدي عن الشعر الليس أو المنسدل تماماً، ولا الغره العريضة، الجانبيه خيار أفضل..

الوجه المستطيل أو الطويل: قصي غرة جانبيه لإنها بتقلل من طول الوجه، والشعر المدرج والويفي مناسب بالنسبة لك..

وبعد ما عرفنا كل شكل بتليق عليه أى قصة في مجموعة حاجات لازم نعرفها قبل ما نقص شعرنا..

نصائح عامة قبل قص الشعر :

• أيا كان هاتقصي شعرك وهو ناشف أو مبلل لازم تتأكدي إنه منساب تماماً ومافيش أي تعقدات لإن ده هايخلي الشعر بأطوال مختلفة، لو هاتقصي شعرك وهو ناشف استخدمي قبل القص مكواة الشعر..

• لو هاتقصي شعرك وهو مبلل اعرفي أن الطول هايقل بعد ما يجف فقصي على الأساس ده..

• المقص لازم يكون حامي جدا، عشان يقص الشعر كله بطول واحد..

• في بعض الصور هاتلاقي الموديلات بيستخدموا أداه لمسك الشعر، موجودة في محلات أدوات التجميل، ولو مش عندك استخدمي الكلبسات العريضة اللي كانوا بيستخدموها زمان، أو بمنتهي السهولة استخدمي أصابعك..

• لو شعرك مقصف قصي فوق التقصف شوية عشان التقصف ميمتدش لباقي الشعر..

الشعر المدرج:

القصة جربيها لو شعرك طويل وعايزاه يكون مدرج بطريقه سهلة، وكمان لو شعرك متوسط الطول ممكن تجربي الطريقة دي من غير التوكه التانيه، طبعا القصة مش لايقة مع وجه الموديل نهائي، فلو وشك طويل يبقى لازم تضيفي مع القصة ديه غرة وتقصري شعرك كمان شوية..

الخطوات:

• اتاكدي أن شعرك مش معقد ومش محتاج تمشيط.

• لمي شعرك كله للأمام زي الصورة عند الغرة.

• باستخدام توكة تانية لمي شعرك عند الطول اللي عايزه تقصيه، وخلي بالك في القصة المدرجة الشعر طوله بوجه عام مش بيقصر بطول الشعر اللي قصتيه عشان ملموم لقدام.

• قصي الشعر في خطوه واحدة جريئة.

• خلصنا وبقى شعرك مدرج.

الغرة الجانبية:

• حددي الشعر اللي عايزه تقصيه عشان يكون الغرة، وده بيكون حسب كثافة شعرك نفسه، بمعنى أن لو شعرك كثيف فأنتِ ليكي حرية تختاري كثافة الغرة، ولكن لو شعرك خفيف فخلي الغرة قليلة أو متوسطة.

• زي الصورة استخدمي إصبعك في تحديد شكل الغرة المائل قدام المرايا.

• بالمقص اتبعي إصبعك اللي ماسكه بيه شعرك.

غرة بأشكال مختلفة:

في أشكال مختلفه للغرة بحيث تناسب كل وجه، والصورة بتعرض ليكي أشكال مختلفه اختاري هنا اللي يناسبك، واتبعي الإرشادات الخاصة بقص شعرك على العموم، ومش لازم الآداة اللي موجودة في الصور، إيدك الشمال كافية جدا أو كلبسة كبيرة.

شعر بطول واحد قصير أو طويل:

• بعد تمشيط الشعر والتأكد إنه من غير أى عقد اقسميه نصفين.

• كل نصف اقسميه نصفين تانى.

• قصي كل نصف لوحده للطول اللي أنتي عايزاه.

• الطريقة دي هاتخلي الشعر أقصر وبأطراف مشفرة أو مشذبه بطريقة لطيفة وحيوية.

ولو تحبي تشوفي فيديوهات تسهل لك تخيل هذه العملية جربي الفيديوهات دي:

فيديو للشعر بطول واحد

فيديو للشعر المدرج

لقص الغرة

وأعتقد إن الفيديوهات والخطوات هاتسهل عليكي قص شعرك في البيت، خصوصاً لو شوفتى الفيديوهات أكتر من مره وجربتي في الغرة.
لينك المقال الاصلي : نصائح لقص الشعر فى البيت