حلوين.. وحشين.. مش عاجبين

بهدي الكلمات الجاية لنورا.. أختي وبنتي وشريكتي وأكتر واحدة فهماني في الدنيا من غير كلام.

مع بداية حملة كل البنات حلوين افتكرت حاجات كتير أكتب عنها، وأولها موقف مردتش أكتبه غير لما استأذنت أختي، لأنها زي ما كانت شريكتي في أغلب تفاصيل حياتي فهي شريكتي في الموقف ده.

من حوالي 15 سنة في جلسة عائلية مش لطيفة، تبرع أحد أقاربي في إنه يقيّم جمالي أنا وأختي، وكان تقييمه العبقري إن أنا جمالي 5 من عشرة وذكائي الخمسة الثانيين، وبالنسبة لأختي جمالها 8 من عشرة وذكاءها الاثنين الثانيين، أنا لغاية دلوقت مش عارفة هو قال كده ليه ولا على أساس إيه هو قيّم إن الجمال والذكاء لازم يكونوا في نسب لبعض.

ولا قبلها اعتقدت إن الجمال له علاقة نسبية بالذكاء، فالجميلات مش ذكيات، الجملة أكيد ضايقتني ولكن ضايقت وأذت أختي الصغرى أكثر، لأنها حبستها في قوقعة إنتي جميلة وغير ذكية لسنوات طويلة، وفي عقلها الباطن كان لما حد يعبر عن إعجابه بجمالها معناها إنه بيتهمها في ذكائها وعقلها وخلى عندها هاجس لإثبات نفسها طول الوقت.

للأسف في مجتمعنا اللي بيحب يحكم على الناس ويحطها في قوالب محفوظة طول الوقت، مش بس البنات اللي مش بيوافقوا معايير الجمال ويتقال عليهم وحشين هم اللي بيقع عليهم الضرر، لأ ده كمان البنات اللي بيوافقوا المعايير دي كمان بيتأذوا بطرق مختلفة. ( اقرأى أيضًا: كل البنات حلوين )

منها المثال اللي عرضته، منها أمثلة تانية زي إن البنت الجميلة تتجوز بدري عشان خطابها كتير، منها إنها سبب مشاكل لأهلها بجمالها والأفضل تتحبس في البيت ومحدش يشوفها، منها إن أهل البنت ممكن يبقى ليهم طلبات مغالية أو شروط مجحفة لزوج البنت الجميلة لدرجة بتسبب تأخير البنت في الزواج أو التفريق بينها وبين شخص بتحبه لأن أهلها شايفين إن بجمالها تستاهل شخص أفضل.

الحكم على البنات في مجتمعنا له ألف أسلوب وأسلوب، والكلمة اللي قالها شخص على عواهنها من زمن لسه معلمة فيها وفيّ، خلتني لوقت طويل أحاول آخد من مظهري وأقلل منه عشان أكون أذكى وأعقل، لأني بسهولة لو 5 ذكاء و5 جمال معرفش إزاي أكون أجمل لكن أعرف إزاي أكون أذكى، فاخترت العقل على المظهر، لغاية ما وصلت في يوم من الأيام إني جميلة رغم ذكائي، وإن مفيش أي تعارض بين الاثنين.

وأختي جابت مجموع كبير، نجحت في كليتها، اتفوقت في شغلها لكن في النهاية محدش قدر يشوف منها غير مظهر جميل، والنعمة اللي ربنا أسبغها عليها، القيود اللي على عقول الناس حولتها لسجن بتحاول تخرج منه بدل ما تستمتع بيه.

معرفش مجتمعنا محتاج كام سنة عشان يعرف إن الجمال ملوش قواعد ولا معادلات، وإن كل البنات حلوين، بس على الأقل مع بنتي مش هسمح لحد يقولها إنتي شعرك مش ناعم أو مش شبه جدتك الجميلة، أو ليه عيونك مش ملونة زي أبوكي.

لو فيه حاجة اتعلمتها من تجربتي إن أنا وإنتي وكل الأمهات لو حاولنا نحمي بناتنا من اللي اتعرضناله، فعلى الأقل هنضمن إننا اديناهم الثقة اللي إحنا كنا محتاجينها، ولمعنا المراية اللي هيشوفوا نفسهم بيها.
للمقال الاصلي : حلوين.. وحشين.. مش عاجبين