فنني في طريقة عمل مناكير

كل البنات بتحب تحط المانيكير أو طلاء الأظافر، وأنا أولهم، بيديني ثقة في نفسي وشكل إيدي، وبحب أوي أكتب وأنا حاطة مانيكير حلو؛ بحس الكلام بيطلع أحلى.

بس المانيكير مش بس فرشة وعلبة وخلاص، دلوقت بقى فيه تقنيات كتير أوي ممكن نستخدمها في المانيكير، بنشوف النجمات العالميات بيستخدموها، وكمان صالونات التجميل الكبيرة.

ومش كل واحدة في إمكانها تروح لصالونات التجميل، عشان تحط مانيكير كل ما تحب بالشكل اللي تتمناه.

عشان كده هعرضلكم -وليّ أنا كمان- أكتر من طريقة ممكن نستخدمها مع المانيكير، بحيث يبقى تجديد بجد لشكل الإيد.

• فرنش بشكل جديد

كلنا عارفين المانيكير الفرنش وموضة من كذا سنة، وعارفين ألوانه الأبيض والشفاف، وممكن البيج أو البينك الفاتح، لكن المرة دي هنستخدمه بطريقة فيها تجديد.

زي الصورة.. هنستخدم ألوان مختلفة هتدي حيوية في الإيد.. والطريقة:

نحط طبقة من اللون الأساسي ونستنى لما تجف تمامًا.

نحط استيكر على الجزء اللي تحت عشان نحط اللون التاني على الطرف اللي فوق بس، ونحط اللون التاني، وبعد ما يجف نشيل الاستيكر، طبعا أي ستيكر قص ولزق من بتاع الأطفال هيقضي الغرض.

وممكن ندخّل تلات ألوان متناسقة أو متعارضة في الطريقة دي حسب ذوق كل واحدة.

• ضيفى استيكر أو أكسسورات لامعة

ممكن تستعملى الاستيكرز اللي بتتباع جاهزة للأظافر، وممكن لو عندك أكسسوارات صغيرة بتلمع أو ألماظ بيلمع تستخدمي الغراء اللي بيستخدم في تركيب الأظافر الصناعية.

الأفضل تستعملي في تركيب الأكسسوارات الملقاط، ومش لازم تستخدميها على كل الأظافر، على واحد أو اثنين في كل إيد كفاية أوي.

• المانيكير اللامع

ممكن للحصول على المظهر اللامع زي اللي في الصورة استخدام أكتر من تقنية، على سبيل المثال ممكن نضيف الجليتر السايب لزجاجة المانيكير ونرجّها ونستخدمها، أو لو مش حابين نعمل كده في زجاجة المانيكير كلها ممكن نستخدم الجليتر مباشرة على الأظافر بعد ما نحط طبقة المانيكير، وعشان نحافظ على الثبات نحط طبقة مانيكير شفاف.

• مانيكير منقط

شكله رائع وأنيق وفي منتهى السهولة، نحط الأول طبقة من اللون الأساسي وبعد كده باستخدام خلة السنان بنحط النقط، ونقدر نحكم أد إيه حسب ما نحب، وممكن نعمل النقط بألوان مختلفة كمان.

ومننساش بعد ما نخلص طبقة من المانيكير الشفاف.

• مانيكير الفهد

شكله أنيق جدًا وسهل، وبيشبه كتير مانكير النقط، نفس الأسلوب ولكن بنستخدم تلات ألوان، بنعمل النقط باللون الذهبي وبعد كده باللون الأسود، وخلة السنان بنرسم حوالين اللون الذهبي دوائر غير مكتملة، ومش لازم تكون الدوائر كلّها منتظمة وشبه بعض، بالعكس، الشكل العشوائي بيكون أجمل.

وفيه تقنيات تانية كتير ممكن تستخدميها، زي تقنية الماء، وفيها بتجيب كوب مياه وبتحطي فيها ألوان مانيكير نقطة من كل لون وتحركيهم عن طريق خلة سنان زي الدوامة، وتغطي الجلد اللي حوالين الظفر ببلاستر وتغمسي الظفر في الماء، هيكون المانيكير واخد شكل ألوان عشوائية.

وممكن عن طريق خلة السنان عمل أشكال مختلفة، والرسم على الأظافر كل الأشكال، بس الموضوع محتاج تمرين وتجارب وعدم خوف من الفشل.

الرجوع للمصدر : أضغط هنا 

للمقال الاصلي : فنني في طريقة عمل مناكير