خطوات زراعة اعشاب و توابل الطبخ

فعلاً ده حلمي وحلم كتير من البنات اللي بتطبخ، إن لما تدور على ريحان أو روزماري عشان تضيفهم على الوصفة اللي بتطبقها تجيب مقص صغير وتقص شوية من الزرعة اللي زارعاها بإيديها، وتضيفها من غير ما تضطر إنها تستخدم أعشاب مجففة أو تستنى لما تنزل الهايبر تجيب الأعشاب اللي ناقصاها وتحفظها بطرق معقدة عشان متفقدش حيويتها بسرعة في الثلاجة.

ومفيش أجمل من منظر شباك أو بلكونة المطبخ ومرصوص عليها إصص الزرع الأخضر الجميل المتنوع، والوقت المثالي لزرع الأعشاب هو بداية الشتاء، يعني يلا بينا دلوقت نبدأ حديقة أحلامنا الصغيرة.

هنتعلم سوا إزاي نزرع الأعشاب اللي بنحبها في أصص صغيرة، ونستخدمها وقت ما نحب من خلال الخطوات الجاية:

• انقعي البذور قبل زرعها في المياه سواء لساعات أو طول الليل.

• املئي الأصص أو كوب من البلاستك بالطمي واتأكدي من حاجتين:

• يكون فيه أماكن مفتوحة في الأصص عشان تصريف المياه الزائدة.

• تأكدي إن التربة مفيهاش أماكن فاضية عشان البذور متسقطش فيها، وبالتالي تكون على الارتفاع المناسب من السطح.

• في عملية الزراعة نفسها، ازرعي الحبة تحت مسافة أد حجمها تلات مرات من السطح، وفي الأغلب مع الأعشاب اللي هنزرعها مش هنحتاج سطح أكتر من عقلة إصبع، وبعده كده نرطب الطين بالمياه.

• تغطية الأصص بالبلاسيتك الشفاف ووضعه في مكان مشمس ودافي، لغاية ما يطلع أول برعم أخضر في نبتتنا الجديدة، واتأكدي في الفترة دي إن التربة دايمًا رطبة.

ودي شوية نصائح للعناية بالأعشاب المزروعة بأنواعها المختلفة:

• الريحان

اقطعي أي زهور، وبكده هتعززي طعم العشب وتزودي عدد الأوراق، ولما تقصي الأوراق اللي محتاجها، استخدمي الأوراق الأعلى وأوراق قليلة من كل ساق.

• البقدونس

البقدونس بيحتاج لفترة إنبات طويلة نسبيًا، من تلات أسابيع إلى أربعة، عشان كده محتاج عناية أكتر وصبر، القص بيكون من السيقان فوق التربة بحاجة بسيطة، وده بيزود النمو.

• الكزبرة

الكزبرة عدو الحرارة، عشان كده يفضل زراعته في الشتاء، واحذري إنك تنسيه في درجة حرارة عالية لوقت طويل وتشذبيه كل فترة، بيؤدي إن إنتاجه بيزيد ولما تقصيه بيعامل معاملة البقدونس.

• الروزماري

الروزماري من النباتات اللي صعب زراعتها من البداية، عشان كده الأفضل شراء نبات مزروع، واعتني بيها بعدها، واحذري المياه الزائدة، لأن الروزماي نبات بيفضّل التربة الجافة نوعًا ما، ولما تستخدميها قصي بمنتهى السهولة أجزاء الساق اللي إنتي محتاجاها.

• الزعتر

الزعتر من النباتات اللي بتاخد وقت في حالة زرعها من البداية، وزي الروزماري ممكن نشتريها مزروعة ونعتني إحنا بيها، وهو من النباتات السهل العناية بيها جدًا وبتفضل التربة الجافة نوعًا، وزي الروزماري اللي تحتاجيه ببساطة قصيه.

• الشبت

من الأعشاب السهل إنباتها جدًا وبتفضل التربة الجافة، ولكن وقت قصها لازم تستني لما تتطول السقان لـ12 بوصة، ومتقصيش أكتر من تلات سيقان كل مرة.

• النعناع

النعناع من النباتات اللي نموها سريع، عشان كده لازم تكون لوحدها في إصيص، وإلا مفيش نبات تاني ممكن ينمو معاها، واستخدامه سهل لأنك ممكن تقصى اللي تحتاجيه بسهولة.

عرفنا إزاي بنزرع وإزاي نعتني، باقي نعرف منين نجيب النباتات دي، سواء على هيئة بذور أو على هيئة نبات مزروع نعتني بيه، سألت وعرفت إنها موجودة في مشاتل كتير جدًا ومتوافرة بسهولة، وبالذات في بداية الشتاء.

للرجع الى المصدر: أضغط هنا  و هنا أيضا 

للمقال الاصلي:خطوات زراعة اعشاب و توابل الطبخ