بقع بقع.. وإيه الحل؟

من أكبر المشاكل اللي بتقابلها ست البيت وأنا شخصيًا بكرهها جدًا، البقع.. خصوصًا في وجود الأطفال، لأن صعب السيطرة عليهم، وبالتالي مع كل وجبة، مع كل حركة عبقرية من حركاتهم، هتلاقي بقعة جديدة سواء على الأثاث والسجاد والستاير وشقى العمر ده كله، أو على الأقل على ملابسهم وملابسك إنتي كمان.

والبقع بتتقسم تلات أقسام، عن طريق الأقسام دي هنعرف إزاي نتعامل معاها:

بقع دهنية:

من الزيوت، زي زيوت الطبخ وزيت الشعر لو عندك بنات، زيوت الآلات لو زوجك بيحب يصلح الحاجات بنفسه.

البقع الدهنية ممكن تزول من على الأقمشة لو غسلتيها مباشرة بعد ما وقعت المادة الدهنية، في الحالة دي بتحطي صابون الغسيل سواء مسحوق أو جل على البقعة مباشرة وبتحاولي تغسليها بالماء البارد قبل ما تحطيها مع باقي الغسيل في الغسالة.

أما في حالة إن البقعة قديمة أو اتكوت فهتسيب علامة صفراء، وفي الحالة دي استعملي مبيض سواء للأبيض أو الألوان، هتساعدك في التخلص من البقعة الصفراء.

في حالة وقعت مادة دهنية على جزء من القماش مبيتغسلش زي الأثاث مثلاً، بنغسل المكان بمادة منظفة من الداخل للخارج بسفنجة، وممكن تاخد أكتر من مرة عشان تحقق النتيجة المرضية، ولكن بين كل مرة والتانية هنسيب القماش ينشف وبعدين نبدأ ننضف تاني.

لو كانت المادة الدهنية اللي وقعت كمية كبيرة يبقى الأفضل تستخدمي مادة لامتصاص الزيت، زي نشا الذرة مثلاً، في الحالة دي بتحطي كمية من نشا الذرة على البقعة وتستنى لما تبقى عجينة تشيليها بهدوء وتحطي تاني نشا لغاية لما تمتص كل المادة الدهنية، وبعدين تنضفي بالسفنجة.

هتلاقي في الأسواق منتجات لتنضيف البقع، لكن للأسف أغلبها بتضيع لون القماش في المكان اللي استخدمتيها فيه، عشان كده جربيها الأول في مكان غير ظاهر واتأكدي هتأثر على اللون ولا لأ.

بقع غير دهنية:

هي البقعة اللي بسبب مواد مختلفة زي الشاي، القهوة، عصير الفاكهة، الحبر...

إذا حصلت بقعة زي دي في قماش ممكن تغسليه فالحل الأمثل هو غسلها بأسرع ما يمكن بسفنجة وماء بارد، لو منضفتش انقعيها بماء بارد وممكن تاخد نص ساعة، وأكثر وقت طول الليل، ولو منضفتش افركيها بمسحوق أو جل غسيل، ولو برضو منضفتش يبقى لازم تستعملي مبيض ملائم لنوع القماش، وللأسف لو البقعة قديمة أو تم كويها ممكن متروحش بصورة نهائية.

البقع غير الدهنية على قماش الأثاث اللي صعب غسله، الحل في البداية مسحها بسفنجة وماء بارد، وفي حالة إن المادة اللي وقعت كتير يبقى الأفضل امتصاصها أولاً باستخدام حفاض بيبي نضيف ثم غسلها بالماء لكن بحذر، بحيث إن البقعة متنتشرش وتفضل في نفس المكان، في حالة إن البقعة لسه موجودة استخدمي جل غسيل ملابس واشطفيه بنفس الطريقة بالسفنجة ومياه باردة، والحل الأخير في حالة إن البقعة لسة موجودة هو تنضيفها بالكحول وشطفها بالماء بسرعة، وفي حالة إن القماش فيه نسبة أكريليك عالية يبقى كحول يتخلط بالماء بنسبة 2:1.

بقع مختلطة:

زي بقع القهوة بالكريمة، أو بقعة أحمر الشفايف، ودي بتكون بقع من مواد دهنية وغير دهنية مع بعض، وفي الحالة دي بنعالج البقعة بالطريقتين، لكن بنبدتي بعلاجها بطريقة البقع غير الدهنية أولًا، وبعدين بنعاملها معاملة البقع الدهنية.

وفيه بعض القواعد اللي لو اتبعناها هتخلينا نتعامل مع البقع بطريقة أكثر فاعلية وسهولة، ومنها:

1. السرعة.. كل ما كان التعامل مع البقعة أسرع كان التخلص منها نهائيًا أسهل.

2. تحديد نوع البقعة ونوع القماش بيساعدك على التخلص من البقعة بسرعة وفاعلية.

3. تخلصي من الكمية غير الممتصة من مسبب البقعة قبل ما تحاولي إزالتها، زي ما قلنا ممكن بنشا الذرة أو بحفاضة أطفال نضيفة أو فوطة قديمة نظيفة أو أي وسيلة تانية مناسبة، بحيث إنك تقللي حجم البقعة اللي بتتعاملي معاها وخلي بالك من إنك تزودي حجم البقعة وإنتي بتعملي كده.

4. اتعاملي مع البقعة بلطف، لأن كل ما حاولتي تشيليها بعنف هتخليها تخترق القماش أكثر أو تنتشر أوسع.

5. تجنبي الحرارة، سواء مياه ساخنة أو المكواه أو أي مصدر حرارة، لأن الحرارة هتخلي البقعة تبقى دايمة، ويستحيل تنضيفها.

6. اختبري أي وسيلة هتستعمليها في مكان خفي من القماش الأول، لأن حتى الماء ممكن يسبب ضرر دائم لأنواع معينة من القماش.

7. نظفي البقعة من الداخل للخارج، بس حافظي على حدود المكان، بحيث إن البقعة متنتشرش.

للرجوع إلى المصدر أضغط هنا 
للمقال الاصلي : بقع بقع.. وإيه الحل؟