الآبل باي أو فطيرة التفاح، طبق حلويات أمريكي مميز جدًا، وبيتقدم في
أغلب مطاعم الفاست فود لكن من عجينة مختلفة عن عجينة الباي الأصلية، وبما
إني بحب الطبق جدًا لكن بطريقته الصح فقررت أتعلمها وأعملها في البيت، في
البداية كانت بتطلع معايا طعمها حلو لكن العجينة ناشفة وتقيلة، ولكن ده
مأحبطنيش لغاية ما وصلت لوصفة مثالية، ومع شوية تريكات صغيرة من نصائح
الصديقات والتجربة والخطأ، هقدملكم دلوقت الوصفة اللي ادتني الآبل باي اللي
واقعة في غرامها حتى النخاع.
فطيرة التفاح
بتتكون من حاجتين رئيستين، عجينة الفطيرة أو الـpie نفسها، وحشوة التفاح،
العجينة موجودة في السوبر ماركت سواء عجينة الباي الأصلية (أو الشورت كراست
short-crust)، أو العجينة المورقة (عجينة الباف باستري puff pastry) اللي
بتدي نتيجة مشابهة للفطيرة المقدمة في مطاعم الفاست فود، لكن بعد تجربة
الاثنين اكتشفت إن العجينة المصنوعة في البيت أفضل كتير، وليكم حرية
الاختيار طبعًا.
مكونات عجينة الفطيرة:
1- كوبان ونصف دقيق.
2- ملعقة صغيرة ملح (مش بستعملها)
3- ملعقة كبيرة سكر أبيض.
4- كوب من الزبدة غير المملحة، مقطعة.
5- من ربع لنصف كوب ماء مثلج (بيختلف حسب نوعية الدقيق).
طريقة عجن الفطيرة:
في
عجينة الفطيرة يفضل متستخدميش إيديكي في العجن، لأن ده بيخلي العجينة
ناشفة، استخدمي محضّر الطعام أو القطعة اللولبية الموجودة مع مضرب البيض،
وكمان متاخديش وقت طويل في العجن، نصف دقيقة على الأكثر في كل خطوة، لأن
كثرة العجن كمان بتسبب العجينة الناشفة.
- اخلطي المكونات ما عدا الماء في محضر الطعام إلى أن يمتزجوا.
- ضيفي ربع كوب ماء بارد، واستخدمي محضر الطعام/ المضرب، ولو حسيتي إن الدقيق محتاج مية ضيفي حاجة بسيطة.
-
لما الدقيق كله يمتزج بالمية ويبدأ يتحول لعجينة، لمّيه بأصابعك وشكّليه
في كورتين، كورة أكبر من الثانية قليلاً، وخلي الكور مسطحة، ولفيهم في
البلاستيك الخاص بالثلاجة، أو في كيس لكن فرغيه من الهواء تمامًا.
- احفظيها في الثلاجة.
مكونات حشوة التفاح:
1-
كيلو تفاح أو ست تفاحات حجمهم كبير، مقشرين ومقطعين (في وصفات كتير التفاح
بيقطع شرائح، لكن نصيحة من صديقة إنها تقطع مكعبات، وجربت الطريقتين
وفعلاً طريقة المكعبات أفضل).
2- ربع كوب من السكر الأبيض
3- ربع كوب من السكر البني (لو مش موجود استخدمي الأبيض)
4- ملعقة كبيرة عصير ليمون
5- ملعقة صغيرة قرفة
6- ربع ملعقة صغيرة جوزة الطيب (اختياري لكن بتعمل طعم مميز)
7- ربع ملعقة صغيرة ملح (مش بستعملها)
8- ملعقتين كبيرتين زبدة غير مملحة
طريقة الحشوة:
- اخلطي التفاح مع نوعين السكر وعصير الليمون والقرفة وجوزة الطيب، واتركيهم في حرارة الغرفة من نصف ساعة لثلاث ساعات على الأكثر.
- صفّي التفاح من العصير الناتج بعد النقع تمامًا.
- ضيفي ملعقتين الزبدة للعصير وارفعيهم على النار لغاية لما يتقل ويبدأ يتكرمل.
التجميع:
-
وقت تصفية التفاح طلعي العجينة من الثلاجة عشان تكتسب حرارة الغرفة، وبعد
عشر دقائق استخدمي النشابة والدقيق في تحويل العجينة لدائرة كبيرة ودائرة
أصغر.
- ضعي الدائرة الكبيرة في صينية الفطيرة على الأرضية
والجوانب، وشيلي أي زوائد بالسكين، ثم ضعي الحشوة (في الوصفة بتضيفي مع
الحشوة عصير التفاح المتكرمل، أنا مش بعمل كده وبسيبه لخطوة تانية).
-
ضعي الدائرة الأصغر، وثبتيها في الأطراف بأصابعك مع العجينة في الصينية،
واستخدمي سكين في صنع خمس فتحات في منتصف الفطيرة على شكل نجمة.
-
وبناء على نصيحة صديقة أنا بستخدم عصير التفاح المتكرمل وفرشاة وبوزعه على
سطح الباي قبل دخولها في الفرن مباشرة، ده بيدي العجينة طعم رائع ولون
مميز.
- دخّلي الصينية الفرن الساخن لمدة من 45 - 55 دقيقة على درجة حرارة 200.
ملحوظة: الوصفة مناسبة لصينية 9 بوصة 23 سم.
إهداء: إلى منى اللي ادتني أغلب التريكات في الوصفة، ومحمد اللي مش بيحب الآبل باي لكن بياكل نصها بس.
المصدر: أضغط هنا
المقال الاصلي: أضغط هنا
ليست هناك تعليقات:
إرسال تعليق