أيوة موضوع سري.. إحنا كبنات مش بنتكلم عنه غير في الجلسات النسائية ومع بنات إحنا عارفينهم كويس وبصوت واطي جدًا أحسن حد يسمعنا.
عشان كده أنا هتكلم هنا برضو بصوت واطي خالص.. ولو فيه راجل معدي يا ريت يعمل نفسه مش موجود ويكون لطيف.
هانتكلم عن إيه؟ هنتكلم عن الشعر الزائد في الجسم وإزاي نتخلص منه.
إيه أحسن الطرق لإزالة الشعر الزائد؟
في
الحقيقة مفيش حاجة اسمها أحسن طريقة، لأن الموضوع ده زي مواضيع كتير
نسائية لازم يكون فيه جانب سيئ أو عيب بمعنى أصح، فعشان كده كل واحدة ليها
طريقة معينة هي المناسبة ليها وممكن تكون فيه أكتر من طريقة بتستخدمها بحيث
لكل منطقة في جسمها طريقة.
نستعرض سوا إيه هي الطرق دي وإيه مميزاتها وعيوبها.
1- السويت
ممكن
تستعمل في أي مكان في الجسم، والشعر بياخد 3-6 أسابيع عشان ينمو تاني،
طبعًا الموضوع ده بيختلف من واحدة للتانية حسب طبيعتها الخاصة.
المميزات:
مصنوعة من مواد طبيعية وبالتالي الضرر على البشرة بيكون أقل من استخدام
بدائل أخرى كيميائية، ده طبعًا بالإضافة لطول المدة اللي بيحتاجها الشعر
عشان يرجع ينمو بالأضافة لأنه بيساعد على إزالة الجلد الميت، وده بيدي
البشرة نعومة أكثر ولون أفتح.
العيوب: الألم، الأحمرار، الكدمات، وممكن بصيلات الشعر تلتهب، لازم تستنى لما يكون الشعر طويل بما فيه الكفاية عشان تستعمليها.
الخلاصة:
لو كنتي تقدري تستحملي الألم فالحل ده مثالي جدًا بالنسبة ليكي لأنه زي ما
شفتي مليء بالمميزات وممكن استخدام هذه الطريقة في أي مكان في الجسم.
2- الواكس (الشمع)
هي
طريقة تشبه السويت لحد كبير في المفهوم نفسه، اللي هو مادة لاصقة بتقوم
بشد الشعر من جذوره، لكن في أسهل من السويت في الحقيقة وفيه منه نوعين،
الأول عبارة عن شرائح جاهزة موجودة في الصيدليات وهى عبارة عن الشريحة
بالمادة اللاصقة (من الشمع) وبنفردها على مكان الشعر اللي عاوزين إزالته
ونشدها، بس كده، النوع التاني هو جهاز للشمع وبنشتريله الشرائح الورقية،
الجهاز بيفرد الشمع على الجسم وبعد كده بنفرد الشرائح ونشدها عكس اتجاه نمو
الشعرونفس أسلوب الشرائح الجاهزة.
أهم حاجة في استخدام جهاز
الواكس مراعاة حرارة الشمع، لأن لو الحرارة عالية ممكن يحرق الجلد -لا قدر
الله- وكمان يُفضّل لو تم تجريبه على منطقة صغيرة من الجلد في البداية
لمعرفة إذا الجلد عنده استعداد للالتهاب أو الاحمرار أو الحساسية.
المميزات: الشعر بياخد وقت طويل للنمو لأن بيتم إزالته من جذوره، يعني من 3-6 أسابيع بدون شعر.
العيوب:
نفس عيوب السويت من ألم واحمرار والتهاب، بالإضافة لمخاطر الحرارة العالية
وحروق الجلد بسبب جهاز الشمع.. عشان كده لازم تتأكدي إن نوع الجهاز بيفصل
عند درجة حرارة مناسبة، وإن جلدك طبيعته مش حساسة من استخدام الشمع.
الخلاصة:
حل مثالى خصوصًا للأماكن الكبيرة من الجسم زي الأرجل، بس لازم تكوني تقدري
تستحملي الألم وممكن تستخدم هذه الطريقة في أي منطقة في الجسم.
ملاحظة
أخيرة: بالنسبة للسويت والواكس بالذات ففي حالة حدوث احمرار أو كدمات أو
حروق فأفضل حل إنك تستعملي الثلج بسرعة على المكان اللى حصل فيه كده، ولو
بيحصل التهاب في البصيلات، فمن الممكن تستخدمي مرهم مضاد حيوي بعد فترة
قصيرة من استخدام السويت أو الواكس، ساعات بعد الاستخدام.
3- السيلك-آبيل (آلة إزالة الشعر)
السيلك
آبيل جهاز لإزالة الشعر من جذوره، وفي النقطة دي بتشبه السويت والواكس في
الوقت اللي بيحتاجه الشعر عشان ينمو مرة أخرى، والآلة عبارة عن جهاز ورؤوس
بيتم تركيبها عليه وكل رأس مخصص لمنطقة معينة في جسم المرأة حسب كثافة
الشعر ودرجة حساسية الجلد في المنقطة، بالإضافة لرأس للحلاقة، وحاليًا يوجد
قطع خاصة لإزالة شعر الوجه.
المميزات: الشعر بياخد وقت طويل
للنمو لأنه بيتم إزالته من الجذور تمامًا بالإضافة لأنها أفضل من السويت
والواكس في إنها ممكن تتعمل في أي مكان وأي وقت بدون أي استعدادات خاصة زي
عمل السويت أو شراء شرائح الشمع، وكمان عملية في إنها بتستخدم وتسيبب الجلد
نضيف بدون اضطرار لغسله عدة مرات لإزالة آثار الشمع أو السويت الملتصق
بالجلد.
العيوب: مؤلمة زي السويت والواكس، ومن الممكن اعتبارها
غالية نسبيًا، لكن بعد التفكير هيكون سعرها معقول جدًا مقابل عدد المرات
اللي ممكن تشتري فيها شرائح الواكس أو آلات الحلاقة أو كريم إزالة الشعر،
ده غير إن جهاز السيلك آبيل له موديلات متنوعة بأشكال وأسعار وإمكانيات
مختلفة.. بعض أنواع البشرة ممكن تكون حساسة فتقدري تجربي على جزء صغير من
الجلد الأول، وعند بعض النساء عندما ينمو الشعر يكون أكثر خشونة.
الخلاصة:
لو عايزة حل سريع وفي منتهى العملية وبيشيل الشعر من جذوره يبقى السيلك
آبيل خصوصًا إن ممكن تستعمليها في كل مناطق الجسم بالإضافة للوجه والمناطق
الحساسة.
4- الحلاقة
الحل ده مكانش مطروح لدائرة النقاش لفترة قريبة، وكانت البنت اللي تفكر في كده ممكن تعتبر مجنونة.
المميزات: حل بدون ألم، نتيجته كويسة وفعّال جدًا.
العيوب:
الشعر بينمو سريعًا، ويعتبر حل مش عملي بالنسبة للسيدات اللي شعرهم تقيل
وأسود لأن ممكن الجذور تكون واضحة، بالإضافة لخشونة الشعر وإنه بيكون تقيل
لما بينمو.
الخلاصة: عايزة حل سريع وعملي ومن غير وجع يبقى
الحلاقة، بس خلي بالك من سرعة نمو الشعر. وممكن تستخدم هذه الطريقة في أي
مكان ما عدا الوجه طبعًا.
5- الكريمات المزيلة للشعر
بيتكون من مواد كيميائية بتحلل الشعرة، بيتفرد وبعد من 5-10 دقائق بيتم غسله.
المميزات: بدون ألم، رخيص، وبيستخدم بسهولة.
العيوب:
الشعر بياخد وقت للنمو أكتر من الحلاقة بس أقل طبعًا من الواكس والسويت،
ومن العيوب الثانية الرائحة اللي ممكن تكون مزعجة لبعض السيدات، وفي أوقات
متقدرش المرأة استخدام هذه الطريقة زي أثناء الحمل.
وكمان لازم تخلي بالك لأنه لو فضل أكتر من الوقت المفروض ممكن يسبب أضرار للجلد.
الخلاصة:عايزة
تشيلي الشعر بسرعة وبدون ألم ولمدة أطول من الشيفينج، يبقى ده الحل
الأمثل، بس خلّي بالك دايمًا من المدة اللي بتسيبيه على جلدك. ممكن استخدام
هذه الطريقة في أي منطقة في جسم المرأة ما عدا الوجه طبعًا.
6- الليزر
هو أقرب حل للمثالية، لأنه الوحيد اللى بيدي أطول فترة ممكنة بدون شعر، لكنه للأسف مش متاح لكل الناس.
فالليزر هو نبضات ضوئية متجمعة ولازم يتم عمل جلسات الليزر على يد متخصص وموثوق فيه وفي مكان محترم.
المميزات:
فيه ناس كتير بتعتبره الحل النهائي لمشكلة الشعر الزائد وده ممكن بس مش
لكل الناس، وده لأن تكلفته عالية نسبيًا، وبيتعمل على عدد من الجلسات، بيتم
تحديدها حسب طبيعة الشعر وكثافته في الجسم.
العيوب: مؤلمة، لكن
أكيد أقل من الواكس، والتكلفة عالية نسبيًا، وللأسف الطريقة دي مش مناسبة
لكل أنواع البشرة، وكل ما كان لون البشرة غامق كان الحل ده مش عملي لأن
فاعلية الليزر بتقل كل ما كان الشعر أتقل وأقوى ولونه أغمق.
الخلاصة:
لو قررتي إن الحل ده مناسب ليكي، يبقى لازم تدوري على المكان المناسب
وتتابعي مع طبيب متخصص وتصبري، لأن الموضوع بيكون له علاقة بدورة الشعر
عندك وبيحتاج أكثر من جلسة، والطريقة دي ممكن تستخدم في أي منطقة في جسم
المرأة.
في النهاية زى ما هو واضح لكل طريقة مميزات وعيوب، وكل واحدة هي الوحيدة اللي تقدر تحدد أي طريقة مناسبة ليها أكثر.
لينك المقال الاصلي: اضغط هنا
ليست هناك تعليقات:
إرسال تعليق