5 نصائح لبيت مرتب

في بداية الجواز البيت الجديد بيكون مثال للأناقة والترتيب، مفيش ورقة مش في مكانها، كل الأركان في أجمل أشكالها ومزينة بالتحف أو على الأقل المفارش، مع الوقت بيبتدي المنظر يتغير، أكيد ما هو فيه ناس عايشة في البيت، وحجم الفوضى بيرجع لحب ربة البيت للنظام، ولكن كل ده بيختلف تمامًا لما يدخل البيت زائر لطيف صغير، الأول ياخد وقتنا كله للرعاية وميكونش فيه وقت لترتيب أو تنظيف، وبعد كده لما يشارك هو بنفسه في عمليات البهدلة والتخريب الكبرى.

أنا بحب البيت مرتب، ولو مش مرتب ده بيأثر على حالتي النفسية جدًا، عشان كده قدرت أحافظ على المظهرالمريح للعين في بيتي، ودي شوية نصائح عشان بيتك كمان يكون مرتب ومريح نفسيًا من غير ما تضيعي وقت كتير.

1- لا للكراكيب

من أهم الحاجات اللي تخرب نظام أي بيت الكراكيب، للأسف عندنا في مصر الاحتفاظ بالكراكيب واجب قومي وبيحصل بطريقة لا شعورية، عشان كده كل مدة بعمل جرد على البيت، وكل حاجة عارفة إني مش محتاجاها فعلاً بطلعها برة وأفرزها، ده ممكن حد يحتاجه أو مفيد، وده مكانه باسكيت الزبالة، والجانبين بيتم التخلص منهم في التو واللحظة، بعد الخطوة دي هتلاحظي إن فيه مساحات فاضية أكتر في بيتك وخزائن مطبخك وملابسك.

2- كل حاجة ليها مكان

من أهم أسباب المظهر الغير مرتب في المنزل، إن مش كل حاجة ليها مكان محدد، بمعنى إن أي حد ممكن يحط حاجة على الترابيزات ويبقى الوضع على ما هو عليه، في الحقيقة ده غلط، لازم كل حاجة إنتي تحددي ليها مكان يكون خاص بيها، وبالتالي وقت انتهاء الغرض منها طبيعي إنها ترجع في مكانها، ده هيسهل عليكي عملية ترتيب المنزل، لأنك مجرد بترجعي كل حاجة لوضعها الطبيعي مش أكتر، وبيكون سهل على أولادك يساعدوكي.

3- روتين تنظيف وترتيب

البيت المرتب مش نتاج حملة تنظيف هتقومي بيها كل مدة تتخلصي بيها من الأتربة والكراكيب، بل نتاج روتين إنتي اللي بتحدديه طبقًا لإمكانياتك واحتياجاتك، لكن على الأقل لازم البيت يترتب مرة يوميًا، في بداية اليوم تلفي على الشقة وكل حاجة ترجع لمكانها اللي حددتيه في الخطوة السابقة، وأي حاجة محتاجة تنظيف سريع تقومي بيها، الخطوة دي مش هتاخد وقت زي المتوقع، لأنها أولاً روتينية، بمعنى إن كل حاجة هترجع لمكانها ليس أكثر، ثانيًا لأنها يومية وبالتالي مفيش حاجة هتتراكم عليكي.

المهم هنا هو تحديد الوقت ده يكون مناسب ليكي، مثلاً في الصباح أو بعد الرجوع من العمل مباشرة.

4- الكل مشترك

بما إن البيت المرتب مش إنتي بس اللي هتسفيد منه، وبالتالي لازم كل فرد يشترك في اتّباع الخطوات السابقة، على الأقل في نقطة كل حاجة ليها مكان، وبالتالي مش من المنطقي إن الزوج يرجع يترك ملابسه في أي مكان ولا حتى الأطفال، الروتين بيعلم الأطفال النظام، وده خلى بنتي اللى عندها سنتين متعودة تخلص الطبق اللي بتاكل منه وترجعه على الترابيزة في المطبخ.

وظيفتك بس مش تعملي روتين لترتيب البيت، وكمان تلزمي كل فرد من البيت إنه يشترك في الروتين ده ولو بخطوة بسيطة.

5- مساحات للتخزين

الطبيعي كل ما الوقت يعدي بيكون فيه حاجات مش محتاجينها دلوقت، بس لا تندرج تحت بند الكراكيب اللي هنتخلص منها، الحاجات دي محتاجة مساحات للتخزين، وبالتالي لازم تدرسي بيتك وتعرفي إيه الأماكن اللي ممكن تخزني فيها، مثلاً تحت السراير، فوق الدواليب، أوضة مش مفروشة، ولكن التخزين لازم يكون بطريقة منظمة، عشان المكان ميكونش فوضوي.

لينك المقال الاصلي: اضغط هنا