مناسبة مهمة ومفاجئة ولازم خلال شهر تفقدي جزء من وزنك الزائد، وإلا مش هتعرفي تلبسي الفستان اللي نفسك فيه.. هتعملي إيه؟

طبعًا معندناش حل غير الدايت، وغالبًا هيكون الدايت الكيميائي اللي بيعتمد على نوع واحد من الأكل وبينزل الوزن بسرعة، بس للأسف الوزن ده بمجرد ما تبطلي الدايت هيرجع كله تاني.
طب والحل؟

الحل عندي.. نظام يخليكي تنزلي جزء من وزنك الزائد خلال شهر وفي نفس الوقت تحافظي على وزنك الجديد، لأنه مبيعتمدش على دايت أد ما بيعتمد على تغيير عادات غلط وإدخال عادات جديدة على نظامك اليومي.

1. خليكى واقعية
الوزن الأمثل اللي تقدري تنزّليه من غير ما تضري جسمك أو بشرتك أو شكل وشك هو من نص كيلو جرام لكيلو جرام في الأسبوع.
ممكن في البداية يكون معدل نزول الوزن أعلى من كده، بس غالبًا على نص الشهر هيكون بالمعدل المذكور.
طبعًا شكل وشك وبشرتك مش حاجات ممكن تجاهلهم، أكيد مش هتحبي تلبسي الفستان اللي نفسك فيه بس مضطرة تستخدمي ماكياج كتير عشان تداري الضرر اللي حصل في لون وشك أو ترهل بشرتك.

2. السعرات الحرارية
ممكن حاجات كتير متقدريش تتحكمي فيها عشان ينزل وزنك، بس السعرات الحرارية ممكن.
الجسم بيستخدم 3500 كالوري زائد عشان وزنك يزيد نص كيلو، يعني لو قللتي سعراتك خلال الأسبوع من 3500 إلى 7000 سعر على مدى الأسبوع هيقل وزنك أكيد.
ممكن تقللي السعرات، بإنك تقللي الكميات اللي بتحطيها في طبقك، متحطيش أكتر من مرة، غيري أكل عالي السعرات زي البطاطس المحمرة والحلويات بالفاكهة والسلطة مثلًا، قللي السكر في العصاير والمشروبات الساخنة، حاجات كتير ممكن تعمليها وتحسبيها وهتلاقي كل سعر بتتخلي عنه هيفرق معاكي في الوزن أكيد.

3. التمارين الرياضية
مش محتاجة تدخلي الماراثون عشان تخسي خلال شهر، الموضوع أسهل من كده بكتير.
في حالة إنك مكنتيش بتتمرني من الأساس، فنص ساعة مشي خمس مرات في الأسبوع هيكون كافي جدًا.
لكن في حالة كنتي بتمارسي تمارين بمعدل منتظم، فإنتي محتاجة تغيري من الروتين بتاعك، يعني لو بتعملي أيروبيك ممكن تضاعفي الوقت، بحيث نص الوقت يكون تمارين عنيفة والنص التاني تمارين خفيفة، أو لو كنتي بتمشي بس أو بتعملي أيروبيك بس تغيري في الروتين، يبقى يوم كده ويوم كده، أو تعملي أنشطة مختلفة زي السباحة مثلًا أو الجري أو حتى الرقص.


الأهم من كل اللي سبق إن الحاجات دي تكون روتين لحياتك، يعني مش مجرد شهر ومناسبة وتعدي، ونكسب نفس الوزن تاني أو أكتر، لو دخّلنا مشي نص ساعة في اليوم في روتينا ممكن يأثر على وزننا وروحنا المعنوية ومش هياخد وقت كتير ولا يبوظ نظام حياتنا، فقدان الوزن مش نشاط بدني قد ما هو نشاط عقلي من وجهة نظري المتواضعة.

المصدر: أضغط هنا