من كام يوم صديقاتي كانوا بيتكلموا عن مصطلح جديد عليّ هو نتواياج. طبعًا حسيت بالجهل الأول بس بعد كده استفسرت وعرفت إنه بيعني تنضيف البشرة بس بعمق شوية، ولقيت إني عملته في البيوتي سنتر أكتر من مرة، بس ولا أعرف اسمه، وكمان كنت بعمله في البيت أيام الفراغ قبل الجواز.

وبما إني افتكرت الموضوع دوّرت على النت على طرق لتنضيف البشرة، يمكن أضيف جديد ليّ وليكم، دلوقت نشوف سوا خطوات تنضيف البشرة في البيت.

1. أول خطوة التنضيف بالبخار. لو معندكيش ماكينة البخار ممكن بمنتهى السهولة تحضري طبق كبير فيه المياه مغلية وتحطيه على ترابيزة قدامك ومعاكي فوطة، وتغطي وشك والطبق مع بعض بالفوطة، عشان البخار يكون مركز على وشك، وتستني على الوضع ده 10 دقائق أو لغاية لما المياه تبرد.
2. اغسلي وشك بصابونك المعتاد ومتنشفيش.
3. اغسلي وشك بكمية مناسبة بالبكينج صودا، وخصوصًا الأماكن الغامقة اللى فيها خلايا ميتة أكثر.
ملاحظة:
البيكنج صودا هو اسكراب للبشرة ممكن تستخدمي بداله مسحوق الترمس مثلًا أو حتى نوع الاسكراب اللي بتستعمليه، مش لازم تتقيدي بنوع معين لأن المهم من الخطوة دي هو تنضيف البشرة.
4. استخدمي ماسك البشرة، ولو بشرتك دهنية يفضل تستخدمي الماسكات الطينية، ولو بشرتك جافة استخدمي ماسك مرطب، سيبي الماسك ينشف وشيليه.
5. اغسلي وشك تانى بصابونك المعتاد ونشفيه.
6. امسحي وشك بتونيك مناسب لبشرتك، وممكن كمان تستخدمي ماء الورد؛ هيغنيكي عن التونيك تمامًا.
7. والخطوة الأخيرة استخدمي مرطب للبشرة.

كده إنتي نضفتي بشرتك في البيت، طبعًا لما بتعملي التنضيف في بيوتي سنتر بيكون فيه خطوات تانية كتير، والموضوع تطور عن أيام ما جربته، واللي مش هتقدر تنزل وتروح البيوتي سنتر تجرب خطوات التنضيف اللي ذكرتها وأكيد هتفيدها.

وفي البيت كمان ممكن نعمل منظفات وماسكات طبيعية ومفيدة للبشرة، دول مجموعة من المنظفات والماسكات واختاري الأنسب لبشرتك.
مع ملاحظة إن المنظف مش بنسيبه على بشرتنا، خمس دقايق بالكتير.
1. منظف عام لكل أنواع البشرة:
1/8 كوب لوز مطحون أو قهوة، معلقتين طعام لبن، معلقة شاي ليمون.
بتخلطي المكونات وتنضفي البشرة بيها وتشطفيها بمياه دافية.

2. منظف للبشرة الجافة:
ربع خيارة مبشورة، معلقتين طعام زبادي، معلقتين طعام شوفان.
بتخلطي المكونات وتنضفي البشرة بيها وتشطفيها بمياه دافية.

3. غسول مرطب بالعسل
معلقة طعام عسل، معلقة طعام نخالة شوفان، معلقة كريمة أو لبن.
سخني الخليط في الميكرويف وحطيه على وشك وهو دافي.

4. منظف منعش للبشرة
1 حبة طماطم، معلقتين طعام لبن، معلقتين طعام ليمون.
اضربي المكونات في الخلاط واستخدميها في غسيل الوش، وممكن تحفظي الباقي في الفريزر لغاية شهر.

5. منظف مجدد للخلايا
قطعة تفاح، معلقتين طعام زبادي، معلقة شاي زيت زيتون، معلقة شاي عصير ليمون.
يضرب الخليط في الخلاط لغاية ما يبقى ناعم جدًا.

6. منظف ومرطب للبشرة
2 معلقة طعام زيت زيتون، 4 حبات عنب، معلقة شاي لبن.
يضرب الخليط في الخلاط ويستخدم مباشرة.

7. ماسك منعّم للبشرة
4 معالق طعام دقيق، 2 معلقة طعام ماء، رشة سكر.
قلّبي الخيط جيدًا.
يترك على الوجه ربع ساعة.

المصدر:

المقال الاصلي : نظفي بشرتك في7 خطوات