7 وصفات مغرية ومفيدة لطفلك

لو إنتي أم لطفل تعدى السنة فأكيد هتفهميني بسهولة وتتعاطفي معايا كمان.

من أسبوع وأنا بتفرج على موقع كورسات مجانية لقيت كورس عن تغذية الأطفال من طبيبة في جامعة ستانفورد (واضح إن عندهم مشاكل في أكل أطفالهم، مش الأمهات المصريات بس).

في البداية الكورس بيتكلم عن مشاكل التغذية الناتجة عن الأكل المصنّع زي السريال المصنوع من الذرة والعصائر، والبطاطس المحمرة وما شابه، من الحاجات اللي ممكن أمهات تديها لأطفالها على أساس إنها غذاء، وفيه حاجات منها أنا كنت بعتبرها مغذية زي السريال مثلًا، لكن اتضحلي إن الحاجات دي كلها نسبة التغذية الصحيحة اللي بتوصل للطفل منها قليلة جدًا، ده بالإضافة إلى مخاطرها، زي وجود سكر وملح أكتر من اللي المفروض الطفل ياخده، ده غير طبعًا المواد الحافظة والألوان الغذائية.

بعد كده شرحت نسب الغذاء اللي المفروض الطفل يتلقاها يوميًا، بمعنى إن نصف كل وجبة من وجباته تكون خضار وفاكهة والربع بروتينات والربع كربوهيدرات.

كل ده جميل، بس أنا كأم ممكن أكون عارفة المعلومات دي كلها، لكن مشكلتي في التطبيق، بنتي مش بتحب أغلب الأكل المغذي، حتى البيض اللي كان الحاجة الوحيدة اللي بتاكلها بصفة يومية بقت بترفضه، ده غير طبعًا رفض الخضراوات والفواكه.

عشان كده هي جايبة أكتر من وصفة لطعام شهي وصحي، والأجمل إنه مش طعام للأطفال بس، لأنه طعام لكل العيلة، ولو دخلتيه ضمن وجباتك هتضمني على الأقل زيادة نسبة الغذاء الصحي تلات مرات في الأسبوع.

البيض في التوست

البيض غذاء متكامل بسبب كمية الأمينو أسيد اللي فيه، عشان كده بيضة كل يوم غذاء ممتاز للطفل وللبالغ كمان.

بيضة، قطعة توست من أي نوع، قطعة زبدة صغيرة.

نقطع منتصف قطعة التوست ونترك مستطيل فارغ، ندوب قطعة الزبدة ونضع قطعة التوست على نار هادية، نضع البيضة ولما تتحمص قطعة التوست من الأسفل نقلبها حتى نضوج البيضة، الصفار لازم ميكونش سائل.

سموزي الفواكهة 

بما إن المفروض الأطفال تاخد من 3-5 ثمرات فاكهة كل يوم، فالسموزي حل عملي جدًا ومفيد، لأنه بيتكون من الفواكه واللبن والزبادي وفطار شهي جدًا.

فاكهة متنوعة زي الفراولة والموز والتوت، الخوخ، المشمش، أو أي نوع يخطر في بالك، مع علبة زبادي ولبن ومعلقة عسل ويضرب في الخلاط.

خضراوات بالصوص 

الوصفة دي بالذات عجبتني جدًا، لأن الخضراوات عامة مش من الأكلات المحبوبة في بيتنا، ما عدا السوتيه اللي بنتي مش بتحبه، وبالتالي الوصفة دي في النص، خضراوات مش بالصلصة، وفي نفس الوقت متنوعة وغنية وشهية.

المكونات:

بصلة، فصين ثوم، رشة زنجبيل مبشور، جزر، كوسة، قرنبيط، بروكلي، فلفل ألوان أو أي خضار يخطر في بالك وعايزة تطبخيه، وصوص (أي صوص زي الصويا صوص، أو صوص المحار، أو سويت آند سور صوص)، زيت زيتون.

بنشوّح البصل والثوم والزنجبيل المقطعين في زيت الزيتون، وبعد كده نضيف الجزر المقطع مكعبات وشوية صوص، دقائق ونضيف بقية الخضار وملح بسيط والصوص بالكمية اللي عايزينها.

دقائق والخضار هيستوي، والسر إن الخضار ميستويش أوي عشان ميبقاش شبه أكل الرضّع ومش شهي بالنسبة للأطفال والكبار.

مهلبية الشوفان

كلنا سمعنا أد إيه الشوفان مفيد لينا ولأطفالنا، بس مفيش وصفات بنعملها منه. الوصفة دي سهلة جدًا وتنفع فطار.

كوباية شوفان بودرة، كوبايتين مياه، لبن، قطعة زبدة، عود قرفة، شربات أو سكر أو عسل للتحلية.

كوباية الشوفان مع كوبايتين المياه وعود القرفة وعلى النار، بعد ما يغلوا نهدي النار ونسيبهم لغاية لما المياه كلها تتشرب.

بعد كده بنضيف اللبن وقطعة الزبدة، ولما الزبدة تسيح نرفع المهلبية من على النار ونضيف اختيارنا للتحلية وبالهنا والشفا.

مكرونة بصوص الطماطم والموتزاريلا

بنسلق المكرونة عادي ونبدأ نعمل السلطة اللي متكوّنة من بصل وفص ثوم وطماطم متقطعة مكعبات.

زيت زيتون نشوح فيه البصل والثوم المقطعين ونضيف الطماطم والملح ومعلقة سكر ومعلقة بابريكا، لما تستوي الطماطم ممكن نضربها بالبليندر أو بالشوكة.

بنرص في صينية بايركس مثلًا أو في طبق طبقة من المكرونة وهي سخنة، عليها طبقة الموتزاريلا وطبقة من الصلصة وطبقة من الموتزاريلا في النهاية.

ناجتس صحية 

كل الأطفال بتحب الناجتس، عشان كده بنلاقيها في وجبات الأطفال في كل مطاعم الفاست فود، لكن المرة دي هنعملها في البيت وصحية تمامًا.

دبابيس مخلية، بيض، بقسماط مطحون، دقيق، ملح، فلفل، زيت زيتون.

بنتبل الدبابيس في الملح والفلفل بعد تقطيعها قطع صغيرة، بنحط القطع في الدقيق ثم البيض ثم البقسماط.

التحمير سهل جدًا وغير ما إحنا متعودين، بياخد وقت شوية بس صحي جدًا، شوية زيت زيتون على مقلاة تيفال أو الجريل وبنحمر كل جانب من قطع الدجاج.

من غير كميات الزيت غير الضرورية والضارة، والأطفال هتاكل الناجتس اللي بتحبها.

أسرع وأسهل كب كيك

الوصفة دي سهلة جدًا وسريعة جدًا جدًا، والمقادير موجودة في كل بيت وكل وقت.

4 بيضات، تلت كوباية سكر، فانيليا، باكينج باودر، دقيق.

بنفصل الصفار عن البياض، ونضرب البياض لغاية ما يتماسك.

بنضيف الفانيليا والسكر على الدقيق وباكينج باودر على الصفار ونضرب، (أنا قلت دقيق ومقلتش أد إيه، لأن الوصفة مش محتاجة معيار أكتر من إن المزيج متوسط مش متماسك ولا سائل).

بعد كده بنضيف البياض على الصفار ونقلب بالمعلقة وبالراحة جدًا، عشان نحافظ على الهوا جوة البياض.

ونوزع المزيج على أوراق الكب كيك المحطوطة جوة صينية الكب كيك وعلى الفرن.

مش بتاخد أكتر من عشر دقايق، ويكون عندنا كب كيك صحي من غير زبدة ولا زيت ولا سكر كتير.

الوصفات كلها صالحة للأطفال من عمر سنة.

متهيألي الوصفات في منتهى السهولة وتفتح الشهية، على الأقل حاولوا تجربوهم، واللي يحب يتابع الكورس اللي بجد مفيد جدًا هيلاقي الكورس في اللينك التالي: أضغط هنا
للمقال الاصلي :
7 وصفات مغرية ومفيدة لطفلك

رسالة من مدمنة

أنا علياء طلعت يوسف، 29 سنة ومدمنة تنضيف.

ده اللي كنت هقوله في اجتماع مدمني التنضيف المتخيل للي عايزين يتعالجوا، بس بما إن مفيش جمعية لعلاج مدمنيي التنضيف يبقى مفيش -لسوء حظكم!- قدامي غيركم عشان أفضفض معاه.

التنضيف مش هواية ولا شغف، الموضوع ميزان بالنسبالي، لما بيكون المكان مش مترتب حواليّ بحس إن أفكاري نفسها مش مترتبة، وإحساس الاكتئاب بيعشش جوايا.

من فترة حصلتلي حادثة وحسيت إن سقف العالم وقع فوق دماغي وإني كان من الممكن بمنتهى السهولة إني أفقد أحب الناس ليّ، قضيت أيام في اكتئاب سخيف، خصوصًا إن كان عندي إصابات خفيفة مخلياني مش قادرة أقوم أنضف، وفي يوم من الأيام كنت وصلت لقاع الاكتئاب والحل اللي لقيته إني أهد الشقة وأبنيها من أول وجديد، بدأت في التنضيف الساعة سبعة مساءً، وخلصت الفجر وغسلت سجادة المطبخ المشهورة طبعًا. أثناء ما بعمل كده مخي كان في أصفى حالاته، حللت مواقف، أخدت قرارات، وبعد ما خلصت حسيت إن العالم بقى صافي ورايق من حواليّ.

ودورت ولقيت ست خطوات ممكن تساعد على التحكم في إدمان التنضيف:

1. الاسترخاء أولًا

من أكبر أسباب إدمان التنضيف أو اللجوء للتنضيف للوصول للراحة النفسية من التوتر والقلق عقلنا الباطن بيقولنا:

"لو قدرت أنضف بما فيه الكفاية، هقدر أتجنب الكارثة أو أخلى الأمور أحسن، أو أي حاجة إحنا محتاجنيها"، وبالتالي الاسترخاء قبل بداية عملية التنضيف بسماع موسيقى هادية أو حتى إننا نقعد مع نفسنا في هدوء هيخلي لما نبدأ تنضيف ميكونش الدافع بس القلق أو الخوف.

2. كسر روتين التنضيف

لازم نعترف إن إدمان التنضيف مش زي إدمان التدخين ولا المخدرات، في الآخر هي عادة حميدة، لكن الزيادة عن المعتاد هو اللي غلط، عشان كده العلاج لازم يكون بالتدريج.

مثلًا ممكن نأخر ميعاد التنضيف اليومي 20 دقيقة مرة، وفي مرة تانية نسيب جزء متعودين ننضفه لتاني يوم.. وهكذا، إحنا بس بنكسر الروتين الاستحواذي اللي مش بنقدر نخرج براه.

3. البحث عن الأسباب

زي ما قلنا إن التنضيف الزائد ممكن يكون بسبب التوتر والقلق، يبقى الحل الأمثل إننا ندور على أسباب القلق ده ونحلها، وبالتالي مشكلة الهوس هتقل تدريجيًا لغاية لما تنتهي تمامًا.

4. هل إنتي خايفة من التلوث والأمراض؟

في ظل الحياة اللي عايشينها والأمراض اللي بنشوفها بسبب الأكل الفاسد والمياه الملوثة طبيعي إننا نخاف من التلوث، لكن لازم نعرف إن مهما نضفنا البيت مفيش حاجة بتكون نضيفة مية في المية.

5. التركيز على أسباب المخاوف الحقيقية

غمضي عينيكي وتخيلي إنك مش هتنضفي النهارده، أكيد ابتديتي تحسي بالقلق وبالتقصير، إن روتين يومك هيبوظ، لكن خليكي مسترخية وفكري إيه اللي ممكن يبسطك غير التنضيف، إن مثلًا ابنك تكون درجاته كويسة، إن خلافك مع زوجك ينتهي، أو أي سبب تاني ممكن يكون السبب الحقيقي في قلقك، وتخيلي إن الحاجات دي حصلت بجد، وشوفي هل إحساسك بالقلق قل ولا لأ؟

6. زوّدي اهتماماتك

فكري لو قللتي الوقت اللي بتقضيه في التنضيف واليوم اللي بيتنظم على أساس الوقت ده، يا ترى هتعملي إيه؟ 

فيه أنشطة كتيرة ممكن تستمتعي بيها في الوقت ده، ولو الأرض محتاجة للكنس ممكن تقولي هخلص الصفحة دي من الكتاب وأقوم أكنس، من غير ما تحسي بالذنب ولا تأنيب الضمير.

فكري يا ترى تحبي الناس يقولوا عليكي "الست دي بيتها على طول نضيف" ولا يقولوا "الست دي حياتها بجد تستحق تتعاش".

بس نرجع بقى لبداية المقال.. أنا في جمعية علاج المدمنين المتخيلة بتاعتي، بحاول أتعالج، عشان كده بدل ما أقوم أنضف بعد ما الفجر أذن، أنا جيت أكتبلكم؛ من ناحية محسش إني المدمنة الوحيدة، ومن ناحية ممكن أحسس واحدة غيري إنها مش مجنونة وإن فيه زيها كتير.

المصدر: أضغط هنا 
للمقال الاصلي : رسالة من مدمنة

القطايف

الحلوى التى قيل فيها :

وقد صرت فى وصف القطايف هائماً .:. ترانى لأبواب الكنافة اقرع

فيا قاضياً بالله محتسباً عسى .:. ترخص لنا الحلوى نطيب ونرتع

كتب هذه الأبيات المؤرخ ابن اياس حين أرتفع سعر السكر فى رمضان 917 هجرياً فتعذر صنع الحلويات الرمضانية المعتادة ..

القطايف التى أرتبطت برمضان ونادراُ ماترى فى غير هذا الموسم تعددت الأقاويل والحكايات عن بدايتها ..

فهناك من يقول أن بدايتها فى نهاية العصر الأموى  وبداية العصر العباسى وأن أول من أكل القطايف فى رمضان هو الخليفة الأموى سليمان ابن عبد الملك عام 98 هجرياً..

بينما فى قصة أخرى نرى أن بداية القطايف كانت فى العصر الفاطمى حيث كان هناك تنافس شديد على تقديم الأنواع الطريفة والجديدة من الحلوى وخصوصاً فى رمضان من ثم أبتكر أحدهم فطيرة محشوة بالمكسرات وقدمها فى صحن على أن يقطفها الزوار ولذلك سميت بالقطايف ..

وفى رواية أخر أنها عرفت فى العصر المملوكى مع الكنافة ..

بينما فى أنتقال كبير فى المكان والزمان هناك من يقول أن القطايف عرفت فى الأندلس حيث عرفها العرب هناك فى غرناطة وأشبلية ثم أنتقلت إلى سائر البلاد العربية ..

أما عن الان فالقطايف لازالت أكلة رمضانية منتشرة فى مصر وفلسطين و سوريا ولبنان والأردن ليتم أنتقال سر صناعتها عبر الأجيال وتظل من أشهر الأكلات الرمضانية ..

المقال الاصلي: اضغط هنا 

يا أنا يا أنت يا شعري

العناية بالشعر، وآه من العناية بالشعر! سواء للمحجبة أو غير المحجبة لكل منهم مشاكلها مع شعرها، ده حتى بنتي اللي مطلعتش من البيضة أنا مشغولة بشعرها من دلوقت، وبجرب معاها أنواع بلسم مختلفة وحمامات زيت.
تخيلوا لما تبقى أحد أقوى معالم الجمال عند الأنثى معرّضة لكل المشاكل دي، زي القشرة، الجفاف، التقصف، الدهنية، البهتان، بجد حاجة محبطة. وأكيد كلنا جربنا وصفات طبيعية متجربة ومنقولة من جيل لجيل، فيه اللي استعمل الجرجير واللي استعمل الثوم واللي استعمل البصل لما الحكاية بقت سلطة خالص! بس أنا المرة دي هجبيلكم وصفات ونصائح أجنبية، لعل وعسى يكون شعرنا اللي اتعود على وصفاتنا يتفاجئ بالوصفات الجديدة وربنا يهديه.

النصائح:

• قوي عضلات شعرك
  شعرك مكون من بصيلات والبصيلات دي ليها عضلات، ولازم نمرّنها زي أي عضلة في جسمنا، تقوية عضلات الشعر بيكون عن طريق لفه زي ديل الحصان ورفعه لوف وشده.
• مساج لفروة الرأس
  مساج فروة الرأس بيساعد على تحسين الدورة الدموية لبصيلات الشعر وزيادة إفراز الزيوت الطبيعية المفيدة.
  
• متسرحيش شعرك زيادة
  تسريح الشعر الزيادة وشخصوصًا للشعر الضعيف بيؤدي لتقصف الشعر.
  
• متغسليش شعرك زيادة

غسيل شعرك بصفة يومية هيؤدي لجفافه، أيًا كان المنتج اللي بتستخدميه لغسل شعرك مش هيكون مفيد زي الزيوت الطبيعية لشعرك، وبالتالي إنتي بتحرمي شعرك وبتؤذيه.
طبعًا ده مينطبقش على الشعر الدهني اللي بيكون عنده إفراط في إفراز الزيوت الطبيعية، وده بيزود من تساقط الشعر.

• شرب المياه
  

• لما تعاني من الجفاف من المؤكد إن شعرك هو كمان هيكون جاف.
  
• تجنبي المياه الساخنة
  المياه الساخنة بتنضف الشعر من الزيوت الطبيعية المفيدة، عشان كده يفضل استخدام الماء اللي أدفى من حرارة الجسم حاجة بسيطة.
  
• انهي حمامك بعصير الليمون
  بعد ما تخلصى حمامك اشطفي شعرك بمعلقة عصير ليمون، وبعد كده نشفيه عادي من غير ما تشطفيه تاني.
  
• احمي شعرك من حمام السباحة
  حتى لو شعرك متغطي، فالمواد الكيمائية اللي في الماء كفاية إنها تؤذي شعرك، عشان كده قبل ما تنزلي حطي على شعرك بلسم يحميه.

• تجنبي تسريح الشعر المبلول
  الشعر المبلول أضعف بمراحل وممكن نؤذيه بسهوله، عشان كده الأفضل نلفه في فوطة ونستني لما ينشف شوية قبل تسريحه.
  
• خلي شعرك ينشف طبيعي
  قللي من استخدام مجفف الشعر، ولو استخدمتيه ميكونش على الوضع الساخن.

• 
  

الوصفات:

• العلاج بالبيض
  

• استخدمي البيضة كلها أو الصفار، ولكن المهم إنك تغطي شعرك بيه لمدة 20 دقيقة قبل الغسل بمياه دافئة.
  
• وصفة لتلميع الشعر
  نص كوب من البلسم على تلات معالق عسل كبيرة، استخدمي من الوصفة دي بعد غسيل الشعر لمدة 30 دقيقة، ثم اغسلي شعرك، هتخلي شعرك لامع ومشرق.
  
• العلاج ببيكربونات الصودا
  بعد الحمام استعملي تلات معالق بيكينج صودا مخلوطة بمياه كافية وسيبيها على شعرك لمدة خمس دقايق، ده هيتخلص من بواقي الشامبو والمستحضرات التانية اللي بتستخدميها، واللي كترها ممكن يضر الشعر.
  
• اعملي البلسم المثالي
  بيضة على زبادي ويتخلطوا كويس، ويدهن على الشعر لمدة من خمس لعشر دقائق ويشطف جيدًا.
  
• وصفة علاج أَضرار الشمس
  نصف كوب عسل، معلقتين زيت زيتون، معلقتين بياض بيض، ويترك على الشعر لمدة 20 دقيقة ويشطف بماء دافئ، الوصفة دي هتعوّض شعرك بالكيراتين والبروتين.
• 
  

المصادر: آضغط هنا
للمقال الاصلي:يا أنا يا أنت يا شعري
 

نصائح للحوامل بين الحقائق والأساطير

خلال فترة الحمل بنسمع كميات من النصائح ، منها اللى بتفيد ومنها اللى مالهاش لازمة وأنا وصديقاتى بنسميها نصائح “خزعبلية” ، فى المقال هانتكلم عن النصائح اللى ليها أسس صحيحة حتى لو اللى بيقولها مش عارف أيه الأسس ديه ونصائح من اللى بالى بالك ..

1. النوم على الضهر أو على البطن

النوم أثناء الحمل صعب جدا ومافيش وضع مريح ، وصعب نتقبل من حد نصيحة وأحنا بجد متألمين.
النوم على البطن رغم كل الأساطير مافيش منه ضرر مباشر، لكن مع الوقت وكبر حجم البطن الوضع مش هايكون مريح للأم ليس أكثر .
أما بالنسبة للنوم على الظهر فهو ده اللي في الحقيقي غلط على الأم والجنين ، غلط على الأم عشان بيؤدى لزيادة أوجاع الظهر بسبب حجم ووزن الجنين وبيعيق سريان الدم للجنين.

1. العلاقة الزوجية
   من أول النصائح اللى بتتقال ، أرمى جوزك من الشباك وإلا هايحصل أجهاض ، لكن علمياً أن طالما مافيش مشاكل صحية عند الأم والطبيب الخاص بيها مطلبش الأمتناع بأمر مباشر فمافيش أى مانع .
2. الرضاعة والحمل
   من النصائح المتداولة ممنوع على الحامل المرضع أنها ترضع طفلها الاول لأسباب كتير منها الخرافى أن اللبن ده فيه سم للطفل ومنها لأسباب شبه طبية ان فيها ضعف للأم والجنين ، لكن العلمي أن من الممكن أكمال الأرضاع حتى أتمام ست شهور من الحمل بدون أي ضرر .
3. الطعام
   أو الأكل ، كلى ليكى وللى فى بطنك وللجيران ، وطبعا نفس اللى قالوا الكلام ده هم اللى بعد الولاده بأسبوع هايبصوا للأم ويقولوا هى مخستش ليه هى سايبه نفسها كده أزاي.
   طبعًا الكلام ده غير صحيح ، الحامل محتاجة الأكل المفيد اللي بيحتوى على العناصر الغذائية المهمة أكتر من غير الحامل ليس أكثر، يعني لو الحامل مهتمة بنظامها الغذائي من الأساس فمافيش أي داعي لتغير كميات أكلها ومضاعفتها .
4. الراحة في السرير
   تعامل الأم معاملة المريض العاجز، رغم أن الحمل ليس مرض ، الحمل حالة عرضية بتحصل لأغلب الستات ومن المفترض طالما مافيش أي داعي طبي أن حركة الأم وتصرفاتها تبقى نفسها وتكون في نفس الوقت منطقية من غير مجهود زائد .

شوية نصائح خزعبلية قبل النهاية متستحقهش أن حد يرد عليها الصراحة .

1. متشربيش قهوة عشان البيبى ميسهرش
   كل أضرار الكافيين للحامل وغير الحامل مش موجودة المهم أن البيبى ميسهرش .
2. متاكليش شطة عشان البيبى ميطلعش أأقرع
   البواسير والأسهال برضه مش مهمين المهم شعر البيبى .
3. ظبطى نومك فى الشهر الأخير عشان البيبى كمان يتعلم ينام بالليل ويصحى بالنهار
   تعالوا بعد مالبيبى يكمل سنة ولسه نومة مش منتظم وأشرحوله الموضوع ده .
4. لما تتوحمى على حاجة ومأكلتيهاش أهرشى فى رجلك أو أيدك عشان الوحمة متتطلعش فى وش البيبى
   لا تعليق بصراحة ..
5. أتفرجى على صور اطفال حلوة ومتشوفيش حد وحش عشان البيبى ميطلعش شبهه
   الله يرحمك يامندل وياعينى على اللى درسوا قوانين الوراثة ..

وفى النهاية جسم الحامل ملكها هى رغم أنها حامل ،ومش مشاع لكل واحدة تتبرع بنصائحها الحمد لله أحنا فى عصر الأنترنت ودكاترة النساء فى كل مكان ومش محتاجين كل النصائح دي

للمقال الاصلى: اضغط هنا 

وصفة متجربة ..تشوكليت تشيبس كوكيز

الوصفة المرة ديه كان كلها تحديات بالنسبة لى ، أولاً لما قولت لجوزي أني هاعمل كوكيز أبتسم أبتسامة شريرة ، سألته أنت مبتحبش الكوكيز ، قالى لأ بحبها وبنفس الأبتسامة الشريرة بما معناه أنه بيحب الكوكيز بس قلقان من اللي هاعمله كوكيز ولا أيه ؟

طبعا ده زادنى أصرار أنى أعملها ..

التحدى التانى أن معنديش تشكوليت تشيبس أساساً، لكن طبعا مش هاخلى حاجة زي ديه توقف قدامي وعملت تشكوليت تشيبس ..

طريقة التشوكليت تشيبس :

قطعة شيكولاته طبخ متوسطة مذابة فوق حمام ماء

سحبت الشكولاته المذابة بحقنة من غير سن وعلى طبق نضيف نزلت نقط كبيرة زى التشيكوليت تشيبس اللى بنشتريها بعد ماخلصت الشيكولاته ومش بتاخد وقت خالص دخلت الطبق الثلاجة بعد خمس دقايق كان عندي تشيكوليت تشيبس زى اللى بنشتريها بالضبط .

وصفة الكوكيز نفسها جبتها من كتاب موسوعة الطبخ سوبر كوك.

المكونات

نصف كوب زبدة

نصف كوب سكر

نصف كوب سكر بنى

بيضة (أنا أستخدمت بيضتين والسبب فى الشرح)

نصف ملعقة شاى فانيليا

كوب ونصف دقيق

نصف ملعقة شاى بيكربونات الصوديوم / بيكينج صودا

ربع كوب بندق

تشكوليت تشيبس

الطريقة :

-          في قدر نضيف السكر بنوعية للزبدة ونضربهم لغاية ما يبقوا مزيج متجانس وهش .

-          نضيف البيضة والفانيليا ونضرب لغاية لما تختفى البيضة .

-          نضيف الدقيق بالبيكينج صودا ونضرب في الوقت ده كان الدقيق غالب على العجين وبالتالي أضفت البيضة التانية والعجينة بقت مضبوطة .

-          أضفت التشوكليت تشيبس وقلبت بمعلقة خشب .

-          ندهن ورق زبدة في صينية بملعقة زبدة ونبدأ نشكل الكوكيز ونستعمل قطعة عجينة صغيرة في كل واحدة لأن العجينة بتكبر ونراعي أن يبقى في مسافات بين الواحدة والتانية لنفس السبب .

-          بتخبز على حرارة 190 لمدة من 10 إلى 15 دقيقة ولازم تراقب بدقة لأن لونها بيتغير بسرعة .

وبالهنا والشفا .

ملحوظة في السريع : طلعت جميلة جدا بشهادة الطبق اللى جوزى نسفه الصبح قبل ماينزل الشغل والحمد لله ماتكسفتش قدامه وأخدت حقى .

خليه يتفرج ومتبقيش نكدية

نا مقلتش يتفرج على حاجة مش ولا بد لا سمح الله، أنا هنا بتكلم عن كأس العالم، اللي كل الناس بتتكلم عنه، وفي كل بيت راجل مستعد يسيب شغله ومياكلش ومينامش في فداء مشاهدة مباراة..

وطبعا في كل بيت خناقة من الزوجات اللي مش قادرة تتفهم إزاى جوزها ممكن يقعد ست ساعات متواصلة قدام التلفزيون من ماتش للتانى، والأسوأ في حالة أنه مش مشترك في القنوات المشفرة، لأنه هايضطر إنه ينزل للكافيهات والقهاوى يتفرج على الماتشات لوش الصبح، يعنى أنا مثلا قعدت أراجع جدول المباريات النهارده عشان أعرف هانتعشى الساعة كام بحيث إنه العشا ميتعارضش مع ماتش كده ولا كده..

أنا معاكم إن الموضوع ممكن يبان غير منطقي، بس من ناحية تانية أنا بحب حاجات غير منطقية، وكل واحدة مننا ليها الحاجات اللي بتحبها غير منطقية، ففيها إيه لو الراجل لمدة شهر كل أربع سنين بقى غير منطقي، وفيها إيه لو كل زوجة اتحملت زوجها في الفترة دي، واتعاملت مع الموضوع بأريحية ومخلتش عنده إحساس إنه بيعمل حاجة هيتعاقب عليها بعد ما يروح..

بعيداً عن كأس العالم وكل الكلام اللي قبل كده، أنا بتكلم عن نقطة مهمة في علاقة كل زوجين أو اتنين مرتبطين، سواء بعلاقة حب أو خطوبة، أن من الطبيعي وجود اهتمامات وهوايات مختلفة، ده حتى لو بنتين وأخوات، يعنى نفس أسلوب التربية.. بيكون في اختلافات، فما بالك باختلافات بين اتنين من نوعين مختلفين! ذكر وأنثي.  ومن وسطين مختلفين وأعمار مختلفة، فهل من المتوقع إن الشخصين دول لمجرد أنهم بيحبوا بعض ومرتبطين أن يكون في تشابه بينهم في كل حاجة ؟؟..

المهم كيفية التعامل مع الاختلافات دي من الطرفين بحيث إن مفيش طرف يخنق التانى أو يحسسه إنه غلط عشان بيعمل حاجة بيحبها، وكمان يكون في احترام متبادل لاهتمامات كل طرف وعدم تسفيهها..

وقت كل شخص في العلاقة ملك للتاني ده مفهوم، خصوصاً لما يكون وقت الشغل بياخد أغلب اليوم، لكن ولنفس السبب الوقت المتبقي عشان الهوايات والحاجات الصغيرة اللي بتهون الحياة وتديها طعم بيكون قليل جدا، فميش داعي إن حد يعتذر على إنه بيعمل حاجة بيحبها ولأن  حد يزعل من حد عشان مبسوط..

للمقال الاصلي : خليه يتفرج ومتبقيش نكدية

12 خطوة لنوم هادئ

بعد ما قربت على التلاتين سنة لازم أعترف إن عندي مشاكل مع النوم، بكره وقت النوم رغم إني أم مرهقة بتصحى أكتر من مرة خلال الليل، وبالتالي المفترض إن لما ألاقي أي وقت مناسب أنام، إلا إني بهرب من النوم.

دورت ورا السبب لغاية ما وصلت إني بكره النوم عشان الوقت اللي قبله، وهو الوقت اللي مخاوفي ووساوسي وقلقي بتنفرد بيّ فيه، وقررت إني أحاول أتخلص من الحالة دي اللي بتخليني طول اليوم تعبانة، عصبية، ومش قادرة أعمل اللي ورايا بالأداء المطلوب، والاستيقاظ متأخر بسبب إني باخد وقت طويل عشان أنام.

وأنا مش فريدة ولا وحيدة من نوعي، بالعكس سيدات كتير بتعاني من الموضوع ده، بسبب ضغوط الحياة وتحملنا للمسؤوليات المتزايدة للبيت والأولاد والتعامل من أمور الحياة خارج البيت، مئات من مسببات القلق.

عشان كده دورت على طرق لتقليل القلق والاسترخاء قبل النوم مختلفة وعملية.

1. الاقتناع إن النوم ضروري

في المعتاد لما نفكر في الحياة الصحية، بنفكر ننظم أكلنا، نزود من الأنشطة الرياضية، وبنتجاهل أهمية النوم، لكن لما نقتنع إن النوم ضروري لحياتنا مش مجرد احتياج جسدي بنقضيه عشان نبدأ يومنا من جديد، هنقدر نعالج مشاكل نومنا.

2. تنظيم مواعيد النوم 

لما جسمنا يتعود على مواعيد للاستيقاظ ومواعيد للنوم، هيبدأ تواصل بين الساعة البيولوجية ومواعيد نومنا وجسمنا مع الوقت هيبقى مهيأ في الوقت ده للنوم.

3. روتين ما قبل النوم 

صعب إننا ننسى قلقنا والأفكار اللي بتدور في عقلنا طول النهار بمجرد إننا دخلنا السرير وقررنا ننام، عشان كده لازم يبقى فيه وقت قبل النوم نفصل بيه بين اليوم بتاعنا ووقت النوم.

الوقت ده بيتراوح بين 30 - 60 دقيقة، وممكن فيهم نقرأ أو نسمع موسيقى هادية أو أي نشاط بيساعد على الاسترخاء.

4. كتابة أسباب القلق والتوتر في وقت مبكر من اليوم

في وقت مبكر من اليوم، يعني مش قبل ما ننام ولا وقت استرخاء ما قبل النوم، ناخد 10 دقايق نكتب فيهم الحاجات اللي قلقانين منها، وبالتالي لما ييجي وقت النوم والحاجات دي تخطر على بالنا ممكن نقول لنفسنا أنا حليت الموضوع ده، أو أنا بفكر فيه وهحله ومش محتاجة أفكر فيه دلوقت.

5. استخدام السرير للنوم فقط

بمعنى منشتغلش على السرير أو نتفرج على التليفزيون في السرير أو أي نشاط تاني، بحيث إن السرير يمكن مرتبط في عقلنا بالنوم.

6. خلق بيئة مناسبة

إضاءة خافتة، هدوء، درجة حرارة مناسبة.

7. شغل التفكير بألعاب عقلية

زي مثلًا نفكر في فاكهة وخضراوات تبدأ بنفس الحرف، نركز على شكل ولون وحجم حاجة معينة، بحيث نبعد عقلنا عن التفكير في مسببات القلق المعتادة.

8. التركيز على الإيجابيات 

زي المناسبات السعيدة والأفكار المفرحة.

9. تمارين للاسترخاء

التمارين الرياضية الهادئة لتنظيم التنفس والاسترخاء.

10. الاشتراك في أنشطة رياضية

التمارين الرياضية بتساعد على تقليل القلق والتوتر، لكن يجب ملاحظة أن تكون في وقت مبكر من اليوم، أو على الأقل قبل موعد النوم بساعات.

11. التساؤل عن مسببات القلق وقلة النوم

لازم نفنّد عاداتنا اليومية عشان نعرف مسببات قلة النوم والقلق الزايد، زي الكافيين مثلًا اللي موجود في الشاي والشيكولاتة والكولا، مش بس القهوة ولا النسكافيه.

12. مراجعة متخصص في النوم

الحمد لله بقى في مصر قلة من الأطباء المتخصص في علاج اضطرابات النوم، مش بالعدد الكافي بس على الأقل فيه اهتمام بالموضوع ده.

وفي النهاية أحب بس أقول إن معالجة اضطرابات النوم ومشاكله مش رفاهية، لأن ربنا خلق النوم لغاية وهدف، وهو منح جسم الإنسان وعقله وقت للراحة، بحيث إنه يقدر ينفّذ وظايفه كاملة، وإهمال النوم له نتائج سيئة على المدى القريب والبعيد.

المصدر : أضغط هنا 

للمقال الاصلي :
12 خطوة لنوم هادئ