دليلك في نظافة ثلاجتك

رائحة ثلاجتك سيئة؟ مش عارفة السبب ولا تتخلصي من الموضوع ده إزاي؟

اتبعي الخطوات دي وهتنسي المشكلة دي أيًا كان سببها.

الحل هينقسم لجزئين:

الجزء الأول: تنظيف الثلاجة

1. شيلي فيشة الثلاجة.

2. فضي الثلاجة من كل اللي فيها والحاجات اللي باظت أو على وشك ارميها.

3. الحاجات اللي ممكن تبوظ ممكن تحطيها في آيس بوكس ومعاها ثلج عشان تحافظي عليها، زي اللحوم والخضراوات المجمدة.

4. حضري مزيج من البيكنج صودا أو بيكربونات الصوديوم والماء الدافئ، نص كوب بيكنج صودا على طبق كبير أو حوض ممتلئ ماء دافئ.

5. خرجي الأرفف والأدراج وأي جزء متحرك تاني. اغسلي الأجزاء دي بالمزيج اللي في الخطوة اللي فاتت. نشفيها كويس وكمان اغسلي حوائط الثلاجة وكل مكان تقدري توصليله.

6. فيه أنواع من الثلاجات بيكون فيها صينية تحت الثلاجة، غالبا بيكون فيها مياه ومش نضيفة، خرجيها بهدوء ونظفيها كويس.

كده خلصنا الجزء الأول ونظفنا الثلاجة. الجزء الثاني إزاي نحمي الثلاجة من تكوين الروائح السيئة.

الجزء الثاني: مواد تساعد على إزالة الروائح السيئة

1. البيكينج صودا:

في حالة وجود رائحة سيئة ومش هتقدري تنظفي الثلاجة، أو كان فيه حاجة باظت وشيلتيها وعايزة تتخلصي من الرائحة، حطي نص كوب من البيكينج صودا في صينية وسيبيها في الثلاجة، وهي بتشتغل عادي لغاية ما الريحة تنتهي، ولو عايزة تستخدميها كأسلوب حماية ممكن تسيبي علبة بكينج صودا مفتوحة على طول.

ده غير مزيج التنظيف اللي عملناه في الجزء الأول.

2. الخل:

الخل مزيل للروائح زي البيكينج صودا، ممكن تستخدمي كوب من الخل وتسيبيه في الثلاجة، أو تخلطيه بالمياه ويكون وسيلة تنظيف.

3. الشوفان:

طبق من الشوفان في الثلاجة هيسحب كل الروائح السيئة.

4. القهوة:

وزعي القهوة في أكثر من رف على أطباق صغيرة.

5. الفحم:

بنفس طريقة القهوة ممكن تحطيه في الثلاجة وهيمتص الروائح السيئة، لكن استخدمي الفحم العادي مش المعالج لسرعة الاشتعال لأنه سام، ولو حبيتى تعيدي استخدام الفحم بعد طلوعه من الثلاجة سيبيه في الفرن المشتعل لدقائق هيتخلص من الرطوبة.

وبكده انتهينا من الثلاجة ورائحتها السيئة وبقت صالحة للاستخدام ونقدر نحافظ عليها برائحة جميلة.

المصدر: أضغط هنا 
للمقال الاصلي: دليلك في نظافة ثلاجتك