جمبري بالثوم والليمون في الفرن

لجمبرى حبيب الملايين ، من أحب الأكلات ليا وكل طريقة لية تحفة أكثر من اللي قبلها خصوصاً لو كان بقشرة حاجة فى منتهى الجمال..

كنت هاعملة الأول طاجن وبعدين فكرت ليه مجددش وأعمل وصفة جديدة !

دورت على النت فى مواقع أجنبية زيادة فى التجديد ولقيت الوصفة دي وعجبتنى من أول نظرة ، ما هو الأكل زى الحب كده من أول نظرة ..

المكونات

جمبرى (فى الوصفة مقشر بس أنا عملته بقشرة)

نصف كوب زبدة

نصف معلقة ملح

6 فصوص ثوم مهروسين

ربع كوب بقدونس مقطع

معلقة شاى بشر ليمون

معلقتين شاى عصير ليمون

الطريقة

فى صينية نوزع الزبدة المذابة ونضيف الثوم والملح  ومعلقة طعام بقدونس ونرص الجمبرى فى طبقة واحدة بس ..

ندخل الصينية الفرن لمدة خمس دقايق ..

بعد خمس دقايق نطلع الصينية نقلب الجمبرى ونضيف الليمون وبشر الليمون وبقية البقدونس وندخل تانى الفرن لمدة من 8-10 دقايق ..

وبالهنا والشفا

طريقة عمل كاستليان أومليت

أكلتنا النهاردة سهلة جداً وهى وتنويع غير الأومليت اللى كلنا عارفينه بس بإضافات جديدة..

تنفع أوى فى فطار الويك أند على سبيل الدلع ، وتنفع كمان غدا خفيف لو زهقتى من الطبخ طول الأسبوع وعايزه تغيرى

أنا عملته مع بطاطس مهروسه بالأعشاب وسلطة كانت وجبة جميلة وخفيفة..

المكونات :

5 معالق طعام زيت زيتون ( أستعملت زيت عادى عشان مش بحب زيت الزيتون لما يتحط على النار)

2 بطاطس متوسطة مقطعة شرائح رفيعة قدر الأمكان

1 بصلة كبيرة مقطعة جيداً

1 فصل ثوم مقطع

نص معلقة شاى ملح

4 بيضات

الطريقة :

فى طاسة كبيرة نسخن 4 معالق زيت على حرارة خفيفة ونضيف البطاطس والبصل والثوم والملح ونسويهم لحوالي 20 دقيقة لغاية لما البطاطس لونها يغير وتستوى ..

نضرب البيض بشوكة لما يمتزج الصفار بالبياض ، فى الوصفة مفيش فلفل أسود بس أنا أضفت رشة بسيطة ، وفى الوصفة بنضيف البطاطس والبصل والثوم على البيض ونقلبهم بس من غير ما البطاطس تتكسر ، بس الأسهل أنك ترصى البطاطس والبصل فى صينية  مدهونه بمعلقة زيت وتتضيفى البيض بحيث أن البيض يغطى كل الصينية ..

ترفع الصينية على النار لمدة 5 دقايق على نار متوسطة لغاية لما تستوى من تحت ..

بعد كده ندخلها الفرن تحت الشواية لمدة دقيتين و وشها يستوى ..

بيتقدم سخن وبالهنا والشفا ..

معلومة على الماشى :

Castilian  ترجمتها قشتالى بالإسباني  بس الأومليت الأسباني  حاجة تانية خالص وبالتالى أنا فضلت اترجم الوصفة كاستليان أومليت والوصفة من موسوعة  سوبر طباخ ..

المقال الأًصلي: اضغط هنا 

نصائح للحوامل بين الحقائق والأساطير

خلال فترة الحمل بنسمع كميات من النصائح ، منها اللى بتفيد ومنها اللى مالهاش لازمة وأنا وصديقاتى بنسميها نصائح “خزعبلية” ، فى المقال هانتكلم عن النصائح اللى ليها أسس صحيحة حتى لو اللى بيقولها مش عارف أيه الأسس ديه ونصائح من اللى بالى بالك ..

1. النوم على الضهر أو على البطن

النوم أثناء الحمل صعب جدا ومافيش وضع مريح ، وصعب نتقبل من حد نصيحة وأحنا بجد متألمين.
النوم على البطن رغم كل الأساطير مافيش منه ضرر مباشر، لكن مع الوقت وكبر حجم البطن الوضع مش هايكون مريح للأم ليس أكثر .
أما بالنسبة للنوم على الظهر فهو ده اللي في الحقيقي غلط على الأم والجنين ، غلط على الأم عشان بيؤدى لزيادة أوجاع الظهر بسبب حجم ووزن الجنين وبيعيق سريان الدم للجنين.

1. العلاقة الزوجية
   من أول النصائح اللى بتتقال ، أرمى جوزك من الشباك وإلا هايحصل أجهاض ، لكن علمياً أن طالما مافيش مشاكل صحية عند الأم والطبيب الخاص بيها مطلبش الأمتناع بأمر مباشر فمافيش أى مانع .
2. الرضاعة والحمل
   من النصائح المتداولة ممنوع على الحامل المرضع أنها ترضع طفلها الاول لأسباب كتير منها الخرافى أن اللبن ده فيه سم للطفل ومنها لأسباب شبه طبية ان فيها ضعف للأم والجنين ، لكن العلمي أن من الممكن أكمال الأرضاع حتى أتمام ست شهور من الحمل بدون أي ضرر .
3. الطعام
   أو الأكل ، كلى ليكى وللى فى بطنك وللجيران ، وطبعا نفس اللى قالوا الكلام ده هم اللى بعد الولاده بأسبوع هايبصوا للأم ويقولوا هى مخستش ليه هى سايبه نفسها كده أزاي.
   طبعًا الكلام ده غير صحيح ، الحامل محتاجة الأكل المفيد اللي بيحتوى على العناصر الغذائية المهمة أكتر من غير الحامل ليس أكثر، يعني لو الحامل مهتمة بنظامها الغذائي من الأساس فمافيش أي داعي لتغير كميات أكلها ومضاعفتها .
4. الراحة في السرير
   تعامل الأم معاملة المريض العاجز، رغم أن الحمل ليس مرض ، الحمل حالة عرضية بتحصل لأغلب الستات ومن المفترض طالما مافيش أي داعي طبي أن حركة الأم وتصرفاتها تبقى نفسها وتكون في نفس الوقت منطقية من غير مجهود زائد .

شوية نصائح خزعبلية قبل النهاية متستحقهش أن حد يرد عليها الصراحة .

1. متشربيش قهوة عشان البيبى ميسهرش
   كل أضرار الكافيين للحامل وغير الحامل مش موجودة المهم أن البيبى ميسهرش .
2. متاكليش شطة عشان البيبى ميطلعش أأقرع
   البواسير والأسهال برضه مش مهمين المهم شعر البيبى .
3. ظبطى نومك فى الشهر الأخير عشان البيبى كمان يتعلم ينام بالليل ويصحى بالنهار
   تعالوا بعد مالبيبى يكمل سنة ولسه نومة مش منتظم وأشرحوله الموضوع ده .
4. لما تتوحمى على حاجة ومأكلتيهاش أهرشى فى رجلك أو أيدك عشان الوحمة متتطلعش فى وش البيبى
   لا تعليق بصراحة ..
5. أتفرجى على صور اطفال حلوة ومتشوفيش حد وحش عشان البيبى ميطلعش شبهه
   الله يرحمك يامندل وياعينى على اللى درسوا قوانين الوراثة ..

وفى النهاية جسم الحامل ملكها هى رغم أنها حامل ،ومش مشاع لكل واحدة تتبرع بنصائحها الحمد لله أحنا فى عصر الأنترنت ودكاترة النساء فى كل مكان ومش محتاجين كل النصائح دي

للمقال الاصلى: اضغط هنا 

وصفة متجربة ..تشوكليت تشيبس كوكيز

الوصفة المرة ديه كان كلها تحديات بالنسبة لى ، أولاً لما قولت لجوزي أني هاعمل كوكيز أبتسم أبتسامة شريرة ، سألته أنت مبتحبش الكوكيز ، قالى لأ بحبها وبنفس الأبتسامة الشريرة بما معناه أنه بيحب الكوكيز بس قلقان من اللي هاعمله كوكيز ولا أيه ؟

طبعا ده زادنى أصرار أنى أعملها ..

التحدى التانى أن معنديش تشكوليت تشيبس أساساً، لكن طبعا مش هاخلى حاجة زي ديه توقف قدامي وعملت تشكوليت تشيبس ..

طريقة التشوكليت تشيبس :

قطعة شيكولاته طبخ متوسطة مذابة فوق حمام ماء

سحبت الشكولاته المذابة بحقنة من غير سن وعلى طبق نضيف نزلت نقط كبيرة زى التشيكوليت تشيبس اللى بنشتريها بعد ماخلصت الشيكولاته ومش بتاخد وقت خالص دخلت الطبق الثلاجة بعد خمس دقايق كان عندي تشيكوليت تشيبس زى اللى بنشتريها بالضبط .

وصفة الكوكيز نفسها جبتها من كتاب موسوعة الطبخ سوبر كوك.

المكونات

نصف كوب زبدة

نصف كوب سكر

نصف كوب سكر بنى

بيضة (أنا أستخدمت بيضتين والسبب فى الشرح)

نصف ملعقة شاى فانيليا

كوب ونصف دقيق

نصف ملعقة شاى بيكربونات الصوديوم / بيكينج صودا

ربع كوب بندق

تشكوليت تشيبس

الطريقة :

-          في قدر نضيف السكر بنوعية للزبدة ونضربهم لغاية ما يبقوا مزيج متجانس وهش .

-          نضيف البيضة والفانيليا ونضرب لغاية لما تختفى البيضة .

-          نضيف الدقيق بالبيكينج صودا ونضرب في الوقت ده كان الدقيق غالب على العجين وبالتالي أضفت البيضة التانية والعجينة بقت مضبوطة .

-          أضفت التشوكليت تشيبس وقلبت بمعلقة خشب .

-          ندهن ورق زبدة في صينية بملعقة زبدة ونبدأ نشكل الكوكيز ونستعمل قطعة عجينة صغيرة في كل واحدة لأن العجينة بتكبر ونراعي أن يبقى في مسافات بين الواحدة والتانية لنفس السبب .

-          بتخبز على حرارة 190 لمدة من 10 إلى 15 دقيقة ولازم تراقب بدقة لأن لونها بيتغير بسرعة .

وبالهنا والشفا .

ملحوظة في السريع : طلعت جميلة جدا بشهادة الطبق اللى جوزى نسفه الصبح قبل ماينزل الشغل والحمد لله ماتكسفتش قدامه وأخدت حقى .