حاربي اكتئاب الشتاء بأطعمة مفيدة ومغذية

حاربي اكتئاب الشتاء بأطعمة مفيدة ومغذية

خلال الشتاء بالذات بيزيد الاكتئاب عند بنات وسيدات كتير، بسبب الجو البارد وغياب أشعة الشمس والحبس الإجباري في البيت، وعلى الأغلب بنتجه للـcomfort food، ودي أكلات بترفع من روحنا المعنوية شوية وتبسطنا، بس للأسف أغلبها بيكون عالي السعرات، ده معناه إنها بتزوّد الوزن وتفتح باب جديد للاكتئاب.

اقرأ أيضاَ: 7 وصفات مغرية ومفيدة لطفلك

النهارده هنتكلم عن أكلات بترفع من الروح المعنوية المنخفضة، وصحية جدًا.

السلمون:

السلمون مليء بالفوائد، غني بالأوميجا 3 والأحماض الأمينية بالإضافة لفوائده النفسية لتأثيره على كيمياء المخ، زي norepinephrine وdopamine وهي اللي بتتحكم في المزاج بشكل عام، وكمان السلمون مصدر رائع للطاقة والنشاط.

اقرأ أيضاَ: فيليه السلمون المدخن بالتفاح

الأوميجا 3:

الأطعمة الغنية بالأوميجا 3Omega-3 Fatty Acids، ليها فوائد صحية لا تعد ولا تحصى، بالإضافة إلى تأثيرها على المزاج. والأبحاث أثبتت إن الناس اللي أكلها غني بالأوميجا 3 بتعاني أقل من الاكتئاب وتقلبات المزاج، ومن الأطعمة الغنية بالأوميجا 3، بذور الكتان (الزيت الحار)، السلمون، عين الجمل.

التوت:

الإجهاد والإرهاق من أكتر الحاجات اللي بتفاقم من أعراض الاكتئاب، التوت بأنواعه المختلفة بيساعد في التحكم في هرمون الكورتيزول اللي بيُفرَز مع الإرهاق وبيأثر على المزاج بشكل عام.

تقليل استخدام السكر:

من الحاجات البديهية بالنسبة لينا إن السكر والحلويات عمومًا بترفع من الروح المعنوية وتقلل الاكئتاب، لكن في الحقيقة العكس هو اللي بيحصل، السكر صحيح بيدينا دفعة نفسية ولكن لوقت قصير، وأول ما تأثيره بيروح الحالة النفسية بتكون أسوأ من الأول، فالأفضل وقت الاكتئاب نبعد عن تناول الحلويات.

الفوليك آسيد Folic Acid:

أثبتت أبحاث كتير إن الفوليك آسيد مفيد في تحسين المزاج لأنه بيساعد على زيادة إفراز هرمون السيرتونين، ومن الأطعمة الغنية بالفوليك آسيد، الخضراوات ذات الأوراق، الشوفان، بذور عباد الشمس، البرتقال، العدس، اللوبيا، فول الصويا.

فيتامين ب 12:

انخفاض نسبة فيتامين ب 12 في الدم بيؤدي للاكتئاب. آخر الأبحاث أثبتت ده، لكن لغاية الآن السبب غير معروف، ولكن بما إن فيتامين ب 12 مفيد على كل الأصعدة وسهل نستخدمه في أكلنا يبقى ليه منزودش من استهلاكه.

الأطعمة الغنية بفيتامين ب 12، اللحوم الحمراء، المحار، الكابوريا، السلمون، البيض، الجبن، اللبن، الزبادي.

فيتامين د:

فيتامين د معروف بإنه فيتامين الشمس، والتعرض للشمس حتى لو لمدة عشر دقائق بس بيغيّر في المزاج، وده من أسباب اكتئاب الشتاء لغياب الشمس.

ولكن ممكن نعوض قلة فيتامين د عن طريق الطعام، زي اللبن، صفار البيض، الأسماك.

الشوكولاتة الغامقة:

معلومة معروفة إن الشوكولاتة بتساعد في علاج حالات الاكتئاب، لكن للأسف المعلومة مش معروضة بالدقة الكافية، فأي شوكولاته مش بتعالج الاكتئاب، لازم تكون فيها نسبة كاكاو 70% على الأقل، عشان كده الأنواع التجارية المخلوطة باللبن مش مفيدة زي ما إحنا فاكرين، والمفروض نختار الشوكولاتة مش حسب النوع اللي بنحبه لكن حسب نسبة الكاكاو اللي فيها.

الموز:

الموز من الفواكه الشهية جدًا والمليانة فوائد لجسمنا وصحتنا النفسية، فيها سكر طبيعي بياخد وقت أطول في امتصاصه، وبالتالي تأثيره على المزاج أطول، والماغنسيوم اللي بيساعد على تحسين النوم وتقليل القلق والتوتر، والتوتر الأرق من أهم أعراض الاكتئاب.
للمقال الاصلي : اضغط هنا