إهداء لآيات وياسمين اللي معايا في نفس الدوامة اليومية.
كستات
إحنا يومنا مشحون دايمًا بالمهام، ما بين مسؤوليات البيت والشغل بتاعنا
والوقت اللي محتاجينه لنفسنا، لكن للأسف فيه أوقات كتير بينتهي اليوم من
غير ما نكون أنجزنا نص اللي إحنا عايزينه، وده بيسبب إحباط كبير لينا.
مع
شغلي الجديد كنت بعاني في البداية إن اليوم كله شغل، والباقي بعمل شغل
البيت ومفيش وقت أقعد مع نفسي، كانت دوامة محبطة جدًا.. لغاية لما خرجت
منها الحمد لله، صحيح مشغولة على طول بس على الأقل بنجز اللي عايزاه
وبستمتع بوقتي.
الحل
كان في تنظيم الوقت، صحيح لغاية دلوقت بحس إن اليوم بيجري بسرعة، لكن على
الأقل في أيام كتير قبل ما أنام براجع اللي عملته وألاقي إني أنجزت فيه
حاجات كتير، وهنا شوية طرق بتساعد في تنظيم الوقت:
1- خططي ليومك
في بداية اليوم أو الأفضل قبل ما تنامي نظّمي يومك، حددي الحاجات اللي محتاجة تعمليها، وحاولي طول اليوم إنك تمشي على المخطط.
2- حددي وقت لكل مهمة
كل
مهمة من مهمات يومك حددي ليها وقت معين من الساعة كذا للساعة كذا. حتى لو
مقدرتيش تلتزمي بالجدول بالضبط ده هيساعدك على إن اليوم يكون قدر الإمكان
تحت السيطرة.
3- استخدمي أدوات لتنظيم الوقت
المفكرات..
سواء الورقية أو الإلكترونية، وكل الوسائل المساعدة اللي بتقدمها
التكنولوجيا استخدميها في تحديد مهامك، واعملي قوائم عليها بالحاجات اللي
عايزه تعمليها.
4- حددي لنفسك مواعيد نهائية
مهامك -خصوصًا لو شغلك من البيت- لازم يكون ليها مواعيد نهائية، سجلي المواعيد دي في المفكرة أو على الموبايل.
5- اتعلمي تقولي لا
للأسف
إحنا بنحمّل نفسنا كستات فوق طاقتنا، وبنخلي الناس ترمي علينا مسؤولياتها،
عشان كده اتعلّمي تقولي لأ لو كان المطلوب منك حاجة هتتعبك أو هتخرب
المخطط اللي عاملاه لنفسك أو مش مسؤوليتك أو حتى مش عايزه تعمليها.
6- ساعة في كل مكان
خلي قدامك في كل مكان حواليكي ساعة، ومن وقت للتاني اتأكدي إنك ماشية على الجدول اللي إنتي عاملاه.
7- التركيز
في
حالة إنك بتعملي أكتر من مهمة في نفس الوقت هتوصلي لأنك مأنجزتيش أي حاجة
في أي مهمة، الأفضل تركزي على مهمة واحدة تخلصيها وتبدئي في غيرها، ولو
بتشتغلي على الكمبيوتر اقفلي صفحات الإنترنت اللي مش محتاجاها وبتضيع
الوقت.
8- تخلصي من وسائل تضييع الوقت
اقفلي
موبايلك وممكن تراجعي المكالمات بعد ما تخلصي شغلك، ده غير طبعًا برامج
الشات وصفحات الإنترنت وكل الحاجات اللي مش متعلقة بشغلك مباشرة.
9- الأولويات
مفيش حد بيقدر يعمل كل حاجة في نفس الوقت؛ حددي أولويات يومك واشتغلي بالترتيب ده.
10- وزعي المهام
في
حالة إن فيه مهمات ممكن تتعمل أحسن من ناس تانين، أو غير مهمة، وزّعي
المهام وتخلّصي من بعض المسؤوليات؛ مش لازم تعملي كل حاجة في البيت على
سبيل المثال، فيه حاجات ممكن أولادك يعملوها، وحاجات ممكن زوجك يعملها.
ليست هناك تعليقات:
إرسال تعليق