5 حشوات مختلفة للسمبوسة

السمبوسة، وفي أقوال أخرى السمبوسك، نوع من المعجنات المحشية والمقلية، إحنا كمصريين عرفناها من الخليج، والسمبوسة شهيرة جدًا في دول الخليج ، ولكن أصولها مش خليجية، وفي حواديت كتير عنها، ناس بتقول تركية وناس تانية شايفه إنها هندية وهو الأقرب للصواب، لأن المطبخ الهندي حافل بالعجائن المقلية.

وحشوات السمبوسة متنوعة، وممكن الإضافة والاختراع فيها بسهولة، والنهارده هنقدملكم مجموعة من أشهى الحشوات عشان تجربوها ، وطبعًا فيه حشوات منطقية ومعروفة زي حشوة اللحمة المفرومة المعصجة بدون إضافات، دي مش هنذكرها، ونركز على الحشوات المبتكرة أكتر.

حشوة اللحم والبسلة والبطاطس:

المقادير:

زيت.

بصل مفروم.

ملح.

كزبرة مطحونة.

كركم مطحون.

بابريكا.

لحم مفروم.

مكعبات بطاطس صغيرة.

بسلة خضراء.

الطريقة:

نسخن الزيت ونضيف البصل إلى أن يصبح لونه أصفر.

نضيف اللحم المفروم على نار هادية لغاية ما يصبح لونه بني.

نضيف مكعبات البطاطس والبسلة ونتركها على نار هادية لغاية ما يتم سواها.

في الآخر نضيف البهارات والملح.

تترك الحشوة لتبرد قبل استخدامها.

حشوة البيض والجبن:

المقادير:

بيض مسلوق مقطع.

نص كمية البيض من الجبن الشيدر.

فلفل أسود.

كمون.

ملح.

الطريقة:

نخلط المكونات مع بعضها، ونحشي بيها مباشرة.

حشوة الفراخ والكوسة:

المقادير:

بصل مفروم.

صدور فراخ مفرومة.

كوسة مفرومة أو قلب الكوسة.

بصل أخضر.

بقدونس مفروم.

شبت مفروم.

كاري.

الطريقة:

بعد ما يصفر البصل على النار نضيف الفراخ المفرومة، ولما يتحول لونها للأبيض نضيف الكوسة.

بعد ما الفراخ تنضج ضيفي البصل الأخضر المقطع والبقدونس والشبت والبهارات والملح وقلّبي، واتركي الحشوة تبرد قبل الاستعمال.

حشوة الخضار:

المقادير:

بطاطس مسلوقة ومهروسة.

بصل مفروم.

ثوم مفروم.

فلفل مقطع.

بسلة مسلوقة.

زنجبيل.

كزبرة خضراء.

ملح.

كاري.

الطريقة:

سخني الزيت وضيفي البصل والثوم.

بعد ما لون البصل والثوم يتغير ضيفي البطاطس والفلفل والبسلة والزنجبيل، واتركي المزيج على النار 5 دقائق.

ضيفي الكزبرة والملح والكاري واتركي المزيج ليبرد قبل الحشو.

حشوة المشروم والذرة:

المقادير:

بصل مفروم.

مشروم مقطع أو مفروم خشن.

ذرة مسلوقة.

كزبرة خضراء مفرومة.

ثوم مفروم.

مكعب مرقة دجاج.

كزبرة ناشفة.

الطريقة:

حمّري البصل مع مرقة الدجاج والكزبرة الناشفة.

ضيفي المشروم وقلّبيه، وبعد ذلك ضيفي الثوم إلى أن تنشف الماء.

ضيفي الذرة والكزبرة الخضراء واطفي النار، واتركي الحشوة تبرد قبل الاستخدام.

للمقال الاصلي: اضغط هنا

طعم البيوت مع حبايبنا

لما بتدور أغنية "طعم البيوت" في دماغي المقطع الأول اللي بسمعه هو "اللمة تحلى كل يوم ساعة العصاري"، يمكن ده بيلخّص كل ما سيقال بعد كده في المقال، بالنسبة لي طعم البيوت هو في وجود الحبايب والأصحاب، وأخدت وقت كتير على ما وصلت لليقين ده، اتهمت نفسى خلاله إني إنسانة قلبها حجر وبتهون عليها العشرة.

نبدأ الحكاية من أولها، مما يقارب الأربع سنين كنت بدأت بجدية في الترتيب لجوازي وبيتي الجديد، الشقة اللي عشان تتوجد طلعت عينينا بالمعنى الحرفي للكلمة، وبدأت في تأثيثها وديكوراتها وانشغلت بالمهمة حتى النخاع، لكن قبل جوازي بيوم قعدت مع نفسي أفكر، يا ترى بيتي القديم مع أهلي، وحجرتي اللي مرتباها على كيفي هي كمان، ومكتبة الحيطة وكل الحاجات دي مش مهتمة بفراقها ليه؟

هل الفرحة بالبيت الجديد ضيعت كل إحساس بالحنين لبيتي القديم؟ طب نتجوز ونشوف، أكيد بعد الفرحة ما تقل زهوتها هيبان الاشتياق، وأحس بالغربة في المكان المختلف.

حصل عكس ده تمامًا، في بيتي الجديد حسيت بألفة من أول يوم، وصحيت الصبح دخلت مطبخي ادوّر على أدواتي عشان أعمل أول فطار ليّ، وأحط أول بصمة، ولما زرت بيت أهلي بعد كده محستش بأي حاجة غير فرحتي بلقائهم والحكايات الكثيرة اللي هنتبادلها.

عدى أكتر من ثلاث سنين، وبسبب بعض التغييرات في ظروف حياتنا، بدأنا نحضر للانتقال لمكان جديد يبعد عن بيتي بكيلومترات، ومش هزوره غير في الأسبوع مرة، وزي ما كنا بنعد العدّة للانتقال كنت بأهب نفسي للحزن اللي هحسه وأنا بفارق أكتر مكان أخذ مني مجهود في التفكير فيه والاهتمام بيه.

ولكن للمرة الثانية فاجئت نفسي وأنا سايبة بيتي القديم وداخلة الجديد مفيش أي إحساس، مجرد تفكير في الحاجات اللي ورايا، وإزاي أحط بصمتي هنا وأحوّل المكان عشان يبقى شبهي، اللي سهّل عليّ الأمر، إن الأسبوع الأخير في شقتي كنت فيه وحيدة بدون زوجي، والجنة اللي عملتها بإيدي كانت فعليًا صحراء من غيره، وكل حنين جوايا للمكان افتقدته.

وافتكرت هنا موقف حصل قبل كده ونسيته وساعد في تكوين فكرتي اللي ذكرتها في أول المقال، زمان كان بيت جدتي في نفس العمارة اللي ساكنين فيها هو مكان تجمّعنا اليومي بعد ما نخلص مذاكرة وأمهاتنا تخلص مسؤولياتها، في ذكرياتي الصالة مكان قعدتنا مكان منور بنور ساطع، مليان ضحك وخناق ودوشة، وزعيق جدتي عشان نسكت وتعرف تسمع التليفزيون، إحنا هنا بنتكلم عن 11 من الأطفال والمراهقين من كل الأعمار، قاعدين في المكان الواسع على الكراسي والأرض وأحضان أمهاتهم، لكن النور ده فعليًا انطفأ بوفاة "تيتة" وفضلنا كتير مش قادرين ندخل البيت من غير ما تنقبض قلوبنا، ورغم مرور أكتر من 13 سنة على غيابها، إلا إن المكان لسه حزين عليها، وطعم البيت راح وقرر ميرجعش.

طعم البيوت فعلاً مش بمكان أو جو معين، طعم البيوت هو وجود حبايبنا معانا، بيت أهلي مفتقدتوش عشان عارفة إنهم موجودين فيه، وحنيني مش لحيطان ولا أثاث، حنيني لناس وذكريات، ولما بفكر فيه بفتكر قعدات بنات العيلة على السريرين وحكايات آخر الليل، ودموع وضحك، والمراية اللي شفت نفسي فيها بعد ما اتجهّزت لكتب كتابي، ودموع أهلي وفرحتهم بيّ.

وبيتي فقدته قبل ما أسيبه عشان زوجي فارقه، ما هو متعبتش في الشقة عشان أسكنها لوحدي، كان هدفي في البداية إني أكون مع الإنسان اللي بحبه، واللي من غيره المكان ملوش أي طعم.

وبيت جدتي راحت مكانته للأبد بغيابها، ومهما اتجمعنا وحاولنا نعيش في نفس الدور القديم، هنلاقي إننا بنمثل وإن روح المكان غابت، فلو عايزين لبيوتكم طعم زيّنوها بالمحبة والذكريات الحلوة وبس.

للمقال الاصلي: اضغط هنا 

8 مشروبات لرمضان في الصيف الحار

بعد كل سنة وإنتو طيبين، ورمضان كريم.

رمضان السنة دي زي ما هو واضح جاي في الصيف، والصيام بين 16 و17 ساعة، عشان كده لازم نحرص على شرب السوائل والعصائر والماء بعد الفطار ولغاية السحور، لأن الجفاف مرهق للجسم أكتر من الجوع.

والمائدة الرمضانية المصرية بتشتهر بالمشروبات المتنوعة، وهنقدملكم هنا طريقة صنع 8 مشروبات، عشان تزينوا بيها سفرتكم، وتتسلوا عليها بدل الحلويات من الفطار للسحور.

1- التمر باللبن:

في نهاية الصيام الجسم بيكون محتاج سكريات سهلة الامتصاص وسوائل، عشان كده أفضل حاجة نفطر عليها التمر واللبن، وفيه طريقتين ممكن نقدم بيهم التمر باللبن ولكن المقادير واحدة.

المقادير:

كيلو لبن.

ربع كيلو بلح بدون نوى.

سكر حسب الرغبة.

الطريقة:

ننقع البلح منزوع النوى لمدة خمس ساعات.

نضيف السكر على اللبن بالكمية اللي عايزينها مع مراعاة إن التمر مليء بالسكريات وبالتالي ملاعق قليلة كافية جدًا.

طريقة التقديم الأولى نضرب التمر مع اللبن في الخلاط ونقدمه.

طريقة التقديم الثانية نضع التمر مع اللبن ثم نوزعه على الأكواب ويؤكل بالملعقة.

2- الخشاف:

مشروب بيجمع بين الفواكه المجففة الشهيرة باسم الياميش.

المقادير:

ربع كوب مشمش مجفف.

ربع كوب تمر منزوع النوى مقطع أنصاف أو أرباع.

ربع كوب تين مجفف.

ربع كوب قراصيا.

ربع كوب زبيب.

أربع أكواب ماء.

مكسرات حسب الرغبة.

سكر حسب الرغبة.

الطريقة:

اجمعي المكونات مع بعضها بدون المكسرات، سيبيها في الثلاجة لأربع ساعات، زيني بالمكسرات قبل التقديم مباشرة.

3- العرقسوس:

العرقسوس بيشرب خارج المنزل في غير رمضان، ولكن صنعه في المنزل طقس رمضاني بحت، وهو ممتاز لأصحاب الضغط المنخفض، ولكن أصحاب الضغط العالي ياخدوا بالهم وكوب كفاية جدًا.

المقادير:

نصف كوب مسحوق العرقسوس.

نصف ملعقة صغيرة بيكربونات الصوديوم (الباكينج صودا).

المكونات موجودة عند العطار.

الطريقة:

قبل الفطار بعدة ساعات، ضيفي المكونات لبعض مع كوب من المياه وقلبيهم لما يبقوا مزيج متجانس، واتركيهم لعدة ساعات.

قبل الفطار بساعة ضعي المزيج من الخطوة اللي فاتت في قطعة من الشاش النظيف واقفليها واربطيها، ثم نزليها في وعاء كبير به الماء، واتركيهم في الثلاجة.

وقت التقديم بتشيلي لفة الشاش وتقسمي العصير على الأكواب.

4- الكركديه:

مشروب مرطب رائع في الصيف، لكن أصحاب الضغط المنخفض يفضل ميكتروش منه.

المقادير:

6 أكواب كبيرة مياه.

كوب من أوراق الكركديه.

نصف كوب سكر أو حسب الرغبة.

الطريقة:

اغلي الكركديه مع الماء لخمس دقائق.

صفي أوراق الكركديه، وضيفي السكر وقلبي.

ضعي المشروب في الثلاجة أو ضيفي مكعبات ثلج، ولو الطعم مركز عند التقديم ضيفي ماء مثلج.

5- التمر الهندي:

المقادير:

10 حبات تمر هندي مجفف (من عند العطار).

5 أكواب ماء.

سكر حسب الرغبة.

الطريقة:

نفس طريقة الكركديه.

6- قمر الدين:

المقادير:

ربع لفة قمر الدين.

5 أكواب مياه.

نصف كوب سكر أو حسب الرغبة.

الطريقة:

نقطع قمر الدين بمقص المطبخ لمربعات صغيرة.

ننقع قمر الدين في الماء لعدة ساعات.

اضربي قمر الدين المنقوع مع السكر في الخلاط.

ضعي العصير في الثلاجة حتى التقديم.

7- عصير الدوم:

المقادير:

كوب دوم مجروش (من عند العطار).

كوب سكر.

8 أكواب ماء.

الطريقة:

على النار نضيف الدوم والسكر مع التقليب إلى أن يسيح السكر، ولكن بدون أن يتغير لونه.

زودي الماء واتركيه ليغلي.

بعد الغليان اقفلي النار وسيبيه يبرد وبعد ذلك صفيه وبرديه في الثلاجة للتقديم.

8- عصير الخروب:

المقادير:

1 كيلو خروب.

2 كوب سكر.

الطريقة: 

انقعي الخروب في لترين ماء طوال الليل.

ضعي الخروب والماء بعد إضافة السكر على النار لمدة ساعة.

صفي العصير وضعيه في الثلاجة.

للمقال الاصلي: اضغط هنا