الأشغال اليدوية.. فنانة في كل بيت

طول عمري بحب الأشغال اليدوية، بالنسبالي فن وكنت بتعلمها بسهولة، والوقت ده كنت طفلة، وكانت جدتي هي اللي بتعلمني الكروشيه، وأتفرج عليها وهي بتشتغل تريكو وبتعمل العجائب بالإبرتين، وأشوف خالتي بتعمل مفارش متثبتة على ورق ومش فاهمة هنحطها على الترابيزة إزاي وهي متثبتة كده.

وبعد جوازي وحملي حبيت أعمل حاجة للبيبي، وجيت أشتغل كروشيه لقيت إني فاكرة البداية وغرزة يتيمة، وبما إني بحب الدقة فدورت على النت لغاية ما لقيت كنز من الدروس والفيديوهات، واتعلمت الكروشيه على أصوله، وعملت حاجات للبيبي وليّ وللبيت، الأهم من اللي عملته كان الإشباع النفسي اللي كنت بحس بيه في كل حاجة بخلصها وبتبهر اللي حواليّ ويحسسوني إني بعمل معجزات بالخيط والإبرة، بعد فترة حبيت أراجع اللي اتعلمته من الفنون الأخرى، ورجعت اتعلمت التريكو وغرز جديدة في الليسيه.

في كل مرة كنت بحس إني محتاجة أحس بالإنجاز وإن لسه ليّ فايدة، كنت بدور على فن جديد وأتعلمه بقواعده الصحيحة، وانبسطت أكتر لما لقيت إني مش وحيدة، وإن صديقات ليّ بيحبوا نفس الحاجات، واتعرّفت على صديقات جدد بسبب الهواية المشتركة.

عشان كده في مقالنا ده هعرفكم على أكتر من نوع من الأشغال اليدوية اللي ممكن تبقى تسلية.. هواية.. أو أسلوب في العلاج النفسي لو حبيتو.

1. الكروشيه

الأقرب لقلبي، وبنستخدم فيه إبرة واحدة قصيرة بنهاية معقوفة، ونقدر نشتغل بيه كل حاجة، ملابس، مفارش، ديكور للبيت ولعب للأطفال.

بحر الكروشيه غويط، عشان فيه أنواع كتير من الكروشيه غير اللي كل الناس عارفاه، فيه الكروشيه الآيرلندي، والكروشيه التونسي، والتابيستري كروشيه، والفيليه كروشيه.

والكروشيه بيتميز بإنه صناعة يدوية بس، يعني مفيش ماكينات لشغل الكروشيه زي التريكو مثلاً، والتنوع في غرزه بلا حدود.

2. التريكو 

هنتكلم هنا عن التريكو اليدوي، بنستخدم فيه إبرتين، وطريقة شغله إن الغرز بتبقى على إبرة وننقلها على الإبرة التانية، وهكذا في كل نقلة سطر زائد، مع التنويع في الغرز لعمل أشكال مختلفة، وممكن إدخال ألوان مختلفة وتكوين رسومات كاملة.

فن التريكو في الشتا بالذات مع كوب من الكاكاو قدام التليفزيون متعة رائعة.

3. الليسيه 

هو فن فرنسي لشغل المفارش بكل أشكالها وأحجامها، وشفت منه مفارش سرير وسفرة متكونة من مفارش صغيرة مختلفة، متجمعة ومتركبة على قماش، وليّ مفرش أحلام زيهم متركب على الأورجانزا هعمله في يوم من الأيام إن شاء الله.

مفارش الليسيه بتبقى باترون مرسوم على ورقة، بنشتريه من المكان اللي بنشتري منه الخيوط، وفيه خيط مخصوص بنمشي بيه فوق خطوط الرسمة اسمه خيط ليسيه، وبنشتغل في الفراغات بين الخطوط بخيط تاني اسمه كوتون بروليه.

والفراغات دي لشغلها فيه مجموعة كبيرة من الغرز، منها غرزة عش النحل، والشطرنج، ورجل الغراب.

ولو حد حابب يتعرف على طريقة الغرز دي أنصحة بفيدوهات ماما سمسم فوزي؛ الست دي بجد خلت الليسيه سهل جدًا، واتعلمت منها مجموعة غرز جديدة.

4. الكانافاه

فن رائع، بنعمل منه لوحات ومخدات، وهو عبارة عن قماش على شكل شبكة، وفيه منه نوعين: نوع بيكون مطبوع عليه الرسمة اللي هنشتغلها، ونوع سادة أبيض.

وممكن نستخدم فيه خيط الكوتون بروليه، حسب الرسمة المطبوعة، أو فيه خيوط مخصوصة له شبه الحرير.

وممكن تعليم الكانافاه للبنات الصغيرة، وفيه رسومات مخصوصة للأطفال بأشكال مبهجة، خصوصًا إن الإبرة غير مدببة.

وغير كده فيه أنواع أشغال يدوية كتير متكلمناش عنها، زي الإيتامين والتطريز والخياطة، كلها فنون وليها معجبات وبتنتقل من جيل لجيل.

للمقال الاصلي: الأشغال اليدوية.. فنانة في كل بيت

الصبغة في البيت.. تجديد على أد الإيد

صبغ الشعر من أكتر الحاجات اللي بترفع الروح المعنوية وتغير في الشكل تمامًا، لما بكون محبطة، متضايقة، حاسة برتابة الحياة، بحب أصبغ شعري؛ بتساعدني إني أخرج من الحالة دي، ولولا خوفي على شعري كنت صبغته كل شهر، بس مرتين في السنة عدد معقول مش مؤذي للشعر.

طبعًا كل واحدة عايزة تصبغ شعرها أكتر حاجتين بتقلقها نوعية الصبغة وهتضر شعرها ولا لأ، والمبلغ اللي هتدفعه عشان تصبغه.

الصبغ في البيت هيريحك من مصدر القلق ده كله.

لما تصبغي شعرك في البيت إنتي اللي هتجيبي الصبغة لنفسك وهتشتري من شركة محترمة ومتأكدة من سمعتها كويس، وفي نفس الوقت سعر الصبغة اللي هتشتريها هيبقى أقل من ربع المبلغ اللي هتدفعيه عند الكوافير.

طيب ويا ترى اللون هيبقى زي اللي كنت هعمله عند الكوافير ولا الجودة هتختلف؟

أحب أطمنك لو نفذتي الكام نقطة الجايين هيبقى زي اللي عند الكوافير بالضبط.

1. اختيار اللون:

إنتي عايزة لون معين، بس لما تيجي تشتري الصبغة لازم تحطي في اعتبارك لون شعرك الأصلي، يعني متجيبيش الصبغة نفس اللون اللي إنتي عايزاه وإنتي شعرك بني غامق أو أسود لأنه مش هيلوّن الدرجة اللي إنتي عايزاها، هتبقى أغمق.

راعي إن لو شعرك غامق هاتي لون أفتح من اللي إنتي عايزاه درجة أو درجتين كمان.

2. الكمية:

شوفي طول شعرك وغزارته واشتري على الأساس ده، لو شعرك طويل أو كثيف بدل العلبة اشتري اتنين، حتى لو كان زيادة يبقى أفضل مما يبقى أقل والنتيجة متكونش مرضية.

3. الصبغة أو الحنة السابقة:

لو كنتي صابغة شعرك قبل كده أسود أو أي لون غامق راعي إنك تزودي اللون الجديد في المنطقة اللي لسه فيها الصبغة، عشان الشعر كله يبقى لون واحد.

أما في حالة كنتي مستعملة الحنة قبل كده فلازم يبقى فيه فترة ست شهور على الأقل بين الحنة والصبغة، لأن الحنة بتأثر على تفاعل الصبغة، وهتدي لون مختلف تمامًا.

4. النوع:

مش بتكلم هنا عن الشركة المنتجة للصبغة، لكن الشكل اللي هتيجي بيه الصبغة، فيه دلوقت نوعين:

- النوع الأول العادي أنبوبة ومحلول وفرشة.

- النوع الثاني وأنا برشحه لأي واحدة حابه تصبغ شعرها لنفسها لأول مرة، وهي الصبغة الفوم، ودي متوافرة وسهلة الاستخدام أكتر، بتشبه غسل الشعر بالشامبو، ومكتوب طريقة الاستعمال بالتفصيل في النشرة داخل العلبة.

5. توزيع الصبغة:

أفضل طريقة لتوزيع الصبغة هي تقسيم الشعر، قسمي شعرك أربع أرباع واشتغلي على كل ربع لوحده، وركزي على منابت الشعر، وبعد ما تخلصي الأجزاء الأربعة وزّعي الصبغة بإيديكي على الشعر كله.

استعملي النقط دي وإن شاء الله تعملي أحلى نيولوك.
للمقال الاصلي : الصبغة في البيت.. تجديد على أد الإيد