من فترة قصيرة اتركزت مشاهداتي في أفلام هوليود من فترة الثلاثينيات والأربعينيات، وبالصدفة شوفت فيلم Bringing Up Baby إنتاج 1938 وبطولة كاثرين هيبورن وكاري جرانت.
فاجئني الفيلم لأنها المرة الأولى اللي اشوف فيها كاثرين هيبورن بتقدم دور كوميدي، والأهم إنها بتقدمه بإجادة كبيرة جدًا، وسيناريو الفيلم كله مكتوب بذكاء شديد خلاني أضحك من قلبي فعلًا أغلب مشاهد الفيلم.
ببعض البحث عرفت أن الفيلم ده ينتمي لنوع سينمائي اسمه "كوميديا الحمقى" screwball comedy ، وده نوع ظهر واندثر تقريبًا في الثلاثنينات من القرن العشرين حتى بدايات الأربعينات، وده لأسباب كتير منها سبب اقتصادي مهم وهو الكساد العظيم اللي عانته الولايات المتحدة في الفترة دي، اللي خلت الناس تتجه للأفلام المفرطة في الكوميديا والعاطفية اللي بيتميز بيها النوع السينمائي ده.
بمعنى أن هنا في تلاقي بين مميزات هذا النوع السينمائي واللي محتاجه المجتمع في الفترة دي، أو الاثنين أثروا على بعض في الحقيقة، زي ما قولت الناس بسبب المصاعب الاقتصادية كانت في حاجة للكوميديا الحمقاء اللي بتقدمها الأفلام دي حيث الأبطال كلهم بيتصرفوا بغير منطقية وبيعملوا أفعال هي ال extream بعينه.
الأفلام دي كذلك كان فيها غالبًا اشتباك بين الطبقات الاجتماعية المختلفة، فهنلاقي في الفيلم اللي اتكلمت عنه في المقدمة، وكذلك أشهر أفلام النوع ده It Happened One Night إنتاج 1934 البطلة الغنية الجميلة بتقع في حب البطل اللي من الطبقة الوسطى والأقرب للفقر في بعض الأحيان، كذلك بطلات هذه الأفلام كانوا شخصيات قوية -على عكس اللي كان سائد إلى حد كبير في الأفلام قبل المرحلة دي- وكان الصراع بين الجنسين على المتحكم في العلاقة العاطفية نقطة مهمة في الأحداث وكمثال على ده فيلم His Girl Friday إنتاج 1940.
أسلوب أفلام كوميديا الحمقى قريب جدًا من كوميديا الفارس المسرحية، وفي منتصف الاربعينات تقريبًا بدأ النوع ده من الأفلام يقل، خاصة مع بدايات الحرب العالمية الثانية، ولكن ده لا يمنع ظهور أفلام في فترات لاحقة بتتمتع بنفس صفات هذا النوع How to Marry a Millionaire إنتاج 1953.
من أشهر المخرجين اللي قدموا هذا النوع من الأفلام وبإجادة شديدة فرانك كابرا وهوارد هوكس وبلي وايلدر وجورج كيوكر.
